Կառավարությունն ԱԳՆ-ին նոր «Մերսեդես» ավտոմեքենա հատկացրեց

Կառավարության այսօրվա՝ փետրվարի 28-ի որոշմամբ, ԱԳՆ-ին ամրացված 2003 թվականի արտադրության Audi A6 L-1.8 ավտոմեքենան հետ վերցվեց եւ ամրացվեց ՀՀ տնտեսական զարգացման և ներդրումների նախարարության պետական գույքի կառավարման կոմիտեին՝ հետագայում օտարելու նպատակով։

Նույն որոշմամբ, Գերմանիայում ՀՀ դեսպանության կողմից շահագործված եւ պետությանը փոխանցված 2016 թ. արտադրության Mercedes-Benz S 350 (արժեքը՝ 27,7 մլն դրամ) ավտոմեքենան ամրացվեց ԱԳՆ-ին:

Որոշման հիմնավորման մեջ նշվում է, որ Գերմանիայում ՀՀ դեսպանության կողմից շահագործված՝ 2016թ. արտադրության Mercedes-Benz S 350 մոդելի ավտոմեքենան տեղափոխվել է Հայաստան՝ Արտաքին գործերի նախարարության կարիքների համար օգտագործելու նպատակով։

Ներկայումս նախարարության կողմից օգտագործվում է 12 տարվա վաղեմության Mercedes-Benz S 350 մոդելի ավտոմեքենա, որի մաշվածության պատճառով ընթացիկ վերանորոգումների հաճախակի կարիք է առաջանում։

Նախագծի ընդունմամբ հնարավոր կլինի ապահովել նշված ավտոմեքենայի փոխանցումը Արտաքին գործերի նախարարությանը՝ առանց լրացուցիչ ծախսեր կատարելու։