Հայաստանում վերաբացել են Միհրան Պողոսյանի օֆշորային սկանդալի գործը

Հետաքննող լրագրողների միջազգային կոնսորցիումը (ICIJ) հայտնել է ՀՀ ԴԱՀԿ ծառայության նախկին պետ, Ազգային ժողովի 6-րդ գումարման պատգամավոր Միհրան Պողոսյանի՝ Պանամայում գրանցած օֆշորային ընկերությունների վերաբերյալ քրեական գործի վերաբացման մասին:

Հրապարակման համաձայն՝ հեղափոխությունից ամիսներ անց Հայաստանի նոր իշխանությունները, այսպես կոչված, Պանամայի փաստաթղթերի հետ կապված գործի շրջանակում կրկին ընթացք են տվել ՀՀԿ-ական նախկին պատգամավորի՝ օֆշորային ընկերությունների շուրջ հետաքննությանը:

Խոսքը Պանամայում գրանցված Sigtem Real Estates Inc., Hopkinten Trading Inc. և Bangio Invest S.A ընկերությունների մասին է: Հետաքննությունը սկսվել էր 2016.թ.-ի ապրիլին՝ «Հետք» լրատվամիջոցի հրապարակումից հետո: Պողոսյանը ժխտել էր օֆշորային ընկերություններում բաժնեմաս ունենալու մեղադրանքը՝ չնայած այն բանին, որ փաստաթղթերում գրանցված է եղել նրա անունը, հասցեն և անգամ անձնագիրը: Պողոսյանի խոսքով՝ իր անունը սխալմամբ է հայտնվել փաստաթղթերում, և ինքը միայն օգնել է ընկերներից մեկին օֆշորային ընկերություն հիմնել: Հրապարակումից հետո, սակայն, Պողոսյանը հրաժարական էր տվել ԴԱՀԿ պետի պաշտոնից:

Ըստ կոնսորցիումի՝ ՀՀ Հատուկ քննչական ծառայությունը հետաքննություն է տանում այս, ինչպես նաև փողերի հնարավոր լվացման ուղղությամբ:

2017թ.-ի հունվարին ապացույցների բացակայության պատճառով գործը կարճվել էր: Նույն թվականի ապրիլին կայացած խորհրդարանական ընտրություններում Պողոսյանը կրկին պատգամավոր էր ընտրվել և շարունակել գործունեությունը ՀՀԿ-ի կազմում:

ICIJ-ին չի հաջողվել հետագա պարզաբանումների համար կապ հաստատել Պողոսյանի հետ: