Արտակ Դավթյան․ «Իսկանդերը» միակ զսպող զինատեսակը չէ, որը մենք ունենք

Զինված ուժերի գլխավոր շտաբի պետ Արտակ Դավթյանը սահմանային իրավիճակը դիտարկում է ընդհանուր տարածաշրջանի համատեքստում, որտեղ, նրա խոսքով, «լարվածության ակնհայտ աճ կա»:

Այսօր Գյումրիում ուսանողների հետ հանդիպմանը Դավթյանը մի կողմից Սիրիայում տիրող իրավիճակը, մյուս կողմից Ռուսաստան - Արևմուտք հակամարտությունը մատնացույց արեց․ - «Այդ երկու գործոնները, իհարկե, ազդում են մեր տարածաշրջանի վրա, մանավանդ՝ հաշվի առնելով, որ անմիջապես Թուրքիայի Հանրապետությունը ներգրավված է այդ գործընթացին․ բացի քրդերի դեմ պայքարից, իրականացնում է նաև Սիրիայում գործողություններ: Բացի դա, մեր հարևան Ադրբեջանը շարունակում է ռազմատենչ հայտարարությունները, զարգացնել իր զինված ուժերը՝ դրանով փորձելով մշտապես ճնշում գործադրել Հայաստանի Հանրապետության ժողովրդի, ղեկավարության վրա, որպեսզի բանակցային գործընթացում ունենա որոշակի հաջողություններ կամ առավելություններ»:

Գլխավոր շտաբի պետը հավելեց, որ ՀՀ զինված ուժերն ամեն ինչ անում են՝ Հայաստանի սահմանների անվտանգությունն ապահովելու համար․ - «Ինչպես նաև հնարավորություն ընձեռելու քաղաքական ղեկավարությանը, որ բանակցությունների ընթացքում զգան իրենց ավելի վստահ և կարողանան վստահ լինել, որ Զինված ուժերը կկատարեն իրենց խնդիրը»:

Ուսանողներից մեկը Ռուսաստանից ձեռք բերված «Իսկանդեր» հրթիռային համալիրի մասին հարցրեց՝ նկատելով, որ այն հանրությանը չի ներկայացվում: Արդյո՞ք զորավարժանքներ կամ մարտական գործողություններ անցկացվել են այդ զինատեսակով:

«Իսկանդերը» միակ զսպող զինատեսակը չէ, որը մենք ունենք: Ունենք նաև այլ զինատեսակներ, որոնք ժամանակին կներկայացնենք: Հիմա հարմար չի ներկայացնելը, կամ հայտարարելը դրանց վերաբերյալ: «Իսկանդերը», որ ունենք, առաջին անգամ ցուցադրվեց շքերթի ժամանակ: Դրանից հետո ցուցադրելու անհրաժեշտություն ես չեմ տեսնում: Ինչ վերաբերում է զորավարժություններին, զորավարժություններ մշտապես անցկացվում են, այս տարի միայն չորս զորավարժություն է անցկացվել «Իսկանդերի» մասնակցությամբ», - նշեց Արտակ Դավթյանը:

Նա անդրադարձավ նաև բանակում արձանագրված միջադեպերին, մասնավորապես՝ վերջին ավտովթարին, որի հետևանքով չորս զինծառայող մահացավ․ - «Միանշանակ ցավալի դեպք է, միանշանակ արդեն հայտարարվել է, որ մեղավորները պատասխանատվության կենթարկվեն, կպատժվեն»:

Գլխավոր շտաբի պետը նաև խոստովանեց, որ եթե դժբախտ դեպքերի թիվը նվազել է, ապա աճել է բանակում ինքնասպանությունների թիվը․ - «Բավականին հարցերով մենք ունենք նվազումներ: Ցավոք սրտի, ունենք որոշակի աճ ինքնասպանությունների հարցով»

Դավթյանը հակադարձեց նաև այն պնդումներին, թե թաքցնում են զոհերի իրական թիվը․ - «Կարող եմ պատասխանատու հայտարարել՝ որևէ դեպք Զինված ուժերում թաքցված չկա»:

Գլխավոր շտաբի պետը ասաց, որ վերջին շրջանում դասալքության դեպքեր չեն արձանագրել:

Բանակում շարունակում են բարեփոխումները․ զինվորներին հնարավորություն է տրվում հեռախոսով խոսել հարազատների հետ, տեխնիկական հարցերը լուծելուց հետո նաև տեսակապ կապահովվի:

Անդրադառանալով դեռ Հանրապետականի իշխանության օրոք ներդրված «Ես եմ» ու «Պատիվ ունեմ» ծրագրերին՝ Արտակ Դավթյանը ասաց․ - «Բոլոր ծրագրերը, որոնք նախկինում հայտարարված են, ունեն շարունակական բնույթ: Ուրիշ հարց, որ հիմա Պաշտպանության նախարարությունում և Զինված ուժերի գլխավոր շտաբում՝ իրականացնելով արդյունքների, փորձի վերլուծությունը, կիրականացվեն որոշակի փոփոխություններ արդյունավետության բարձրացման ուղղությամբ»: