Արդարացվել է նաև Ռուսաստանում դատապարտված վարորդ Հրաչյա Հարությունյանը

Ռուսաստանում դատապարտված և պատիժը կրելու համար Հայաստան տեղափոխված հայ վարորդ Հրաչյա Հարությունյանը ևս համաներմամբ արդարացվել է:

Tert.am-ի հետ զրույցում ինքը՝ Հրաչյա Հարությունյանն ասաց, որ 2018 թ.-ի հուլիսին իր խափանման միջոցը փոխվել էր, այժմ նա արդարացվել է:

«Հուլիսից իմ խափանման միջոցը փոխվել էր: Ամեն օր տանն էի, ուղղակի պետք է գնայի, ստորագրեի, հետ գայի: Հիմա արդարացվելու եմ, համաներումն ազդելու է ինձ վրա»,- ասաց Հ. Հարությունյանը։

Հիշեցնենք, որ 2013թ. հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղևորատար ավտոբուսին, ինչի հետևանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Հրաչյա Հարությունյանը Ռուսաստանում 6 տարի 9 ամիս ժամկետով ազատազրկման էր դատապարտվել: 2017թ. հուլիսի 20-ին Հրաչյա Հարությունյանը տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը Հայաստանում կրելու համար:

Հիշեցնենք, որ համաներման մասին որոշումը գործում է այսօրվանից՝ նոյեմբերի 6-ից։ Ժամը 15:30-ի դրությամբ ՔԿՀ–ներից համաներմամբ ազատ է արձակվել 81 անձ։