Ովքե՞ր են «Հայաստան» համահայկական հիմնադրամին 1 միլիոն դոլարից ավելի գումար փոխանցել

Հաշվի առնելով «Հայաստան» համահայկական հիմնադրամի տնօրեն Արա Վարդանյանի հետ կապված բացահայտումները և նրա ձերբակալությունը՝ Tert.am-ը ներկայացնում է հիմնադրամի գործունեության, այստեղ իրենց նվիրատվությունն անողների և հոգաբարձուների խորհրդի կազմի մասին հակիրճ տեղեկատվություն:

Կառույցի պաշտոնական կայքում հրապարակված տեղեկատվության համաձայն՝ «Հայաստան» համահայկական հիմնադրամը ստեղծվել է 1992 թվականին ՝ ՀՀ նախագահի հրամանագրով՝ որպես եզակի մի կառույց, որը կոչված է համախմբել Հայաստանում և արտերկրում ապրող բոլոր այն հայերին և նրանց համախոհներին, ովքեր պատրաստակամ են իրենց ջանքերն ուղղել Հայաստանի նորաստեղծ հանրապետության և Արցախի կայուն զարգացմանը:

Պետք է նկատել, որ հիմնադրամի նվիրատուները բաժանվում են 4 կատեգորիաների՝ «Պատվո անդամ», որի նվիրաբերած գումարը 1 000 000 դոլար և ավելին է, «Բարերար անդամ, որի նվիրաբերած գումարը՝ 5 00 000 և ավելի դոլար է, «Աջակից անդամ», որի նվիրաբերած գումարի չափը՝ 250 000 և ավելի դոլար է, «Նվիրատու անդամի» դեպքում՝ 100 000 և ավելի դոլար:

 Հիմնադրամի «Պատվո անդամների» շարքում են, այսինքն՝ 1 000 000 դոլարից ավելի գումար են փոխանցել «Տաշիր» ընկերության սեփականատեր Սամվել Կարապետյանը, Հնդկաստանի կառավարությունը, Անդրանիկ Բաղդասարյանը՝ ԱՄՆ-ից, Ժան Պողոսյանը՝ Բելգիայից, Տիգրան Իզմիրլյանը՝ Շվեյցարիայից, Հայկական Բարեգործական Ընդհանուր Միությունը (ԱՄՆ), «Լինսի» հիմնադրամը՝ ԱՄՆ-ը և այլն:

«Հայաստան» համահայկական հիմնադրամի բարձրագույն ղեկավար մարմինը Հոգաբարձուների Խորհուրդն է: Հիմնադրամի կանոնադրության համաձայն`Հայաստանի Հանրապետության նախագահն ի պաշտոնե Հիմնադրամի Հոգաբարձուների Խորհրդի նախագահն է: Խորհրդի կազմում են պետության, եկեղեցական, կուսակցական, հասարակական և բարեգործական կառույցների ներկայացուցիչներ: Նրանց թվում են՝ ՀՀ վարչապետ Նիկոլ Փաշինյանը, ՀՀ պաշտոնաթող նախագահ Ռոբերտ Քոչարյանը, Արցախի Հանրապետության նախագահ Բակո Սահակյանը, Արցախի Հանրապետության պաշտոնաթող նախագահ Արկադի Ղուկասյանը, աշխարհահռչակ երաժիշտ Շառլ Ազնավուրը, Կարնեգի հիմնադրամի նախագահ Վարդան Գրեգորյանը, արգենտինահայ բարերար Էդուարդո Էռնեկյանը և այլք:

Խորհուրդը հրավիրում է տարեկան ժողով, որին մասնակցում են հոգաբարձուները, տեղական մարմինների և գործադիր վարչության ներկայացուցիչները:

Պետք է նկատել, որ «Հայաստան» համահայկական հիմնադրամի հոգաբարձուների խորհրդի նիստը կայացել էր վերջերս՝ մայիսի 25-ին, որի ժամանակ հիմնադրամի գործադիր տնօրենի պաշտոնում վերահաստատվել էր Արա Վարդանյանը․ հոգաբարձուների խորհրդի նիստում բոլոր անդամները միաձայն քվեարկել էին նրա օգտին՝ վստահություն հայտնելով հիմնադրամի աշխատանքին։

Խորհրդի նիստից մոտ 1 ամիս հետո՝ հուլիսի 3-ին, Արա Վարդանյանը ձերբակալվել է:

Ըստ Ազգային անվտանգության ծառայության պաշտոնական կայքի՝ փաստական հանգամանքների ճնշման ներքո Վարդանյանը խոստովանել է, որ տնօրինելով հիմնադրամին տրամադրված 25 միլիոն դրամի վարկային գծով բանկային քարտը՝ դրա միջոցներն օգտագործել է անձնական նպատակներով, այդ թվում դրանք ուղղելով տարբեր առցանց խաղատներում խաղադրույքներ կատարելուն:

Ըստ իր խոսքերի՝ վարկային քարտից վատնած միջոցները Վարդանյանը հետ է վերադարձրել հիմնադրամին հանգանակված գումարների հաշվին: Այնուհետև անձնական միջոցները կանխիկ մուտքագրել է հիմնադրամի հաշվապահություն՝ դրանով իսկ թաքցնելով հիմնադրամի գումարների վատնման հանգամանքը: