Ճապոնիայում ուժգին երկրաշարժ է տեղի ունեցել. կա 200-ից ավելի տուժած (լուսանկարներ)

Ճապոնիայի արևմտյան Օսակա պրեֆեկտուրայում տեղի է ունեցել 6.1 մագնիտուդ ուժգնությամբ երկրաշարժ, ինչի հետևանքով զոհվել է առնվազն 3 մարդ, մինչդեռ տուժածների թիվը գերազանցում է 200-ը:

Ինչպես հաղորդում է rt.com-ը, զոհերի թվում կա երկու տղամարդ, ինչպես նաև իննամյա աղջիկ, որը մնացել է դպրոցի փլուզված պատերի տակ:

Ինչ վերաբերում է տուժածներին, ապա նրանց թիվը 217 է: Աղբյուրը մանրամասնում է, որ ստորգետնյա ուժեղ ցնցումները զգացվել են ոչ միայն Օսակայում, այլ նաև հարևան պրեֆեկտուրաներում:

Ներկայում Օսակայում և հարևան Հյոգոյում 170.000 տուն հոսանքազրկված է: Բացի այդ, որոշ տեղերում պայթել են ջրատար խողովակներ, հրդեհ է բռնկվել: Հայտնի է, որ Օսակայի օդանավակայանը ժամանակավորապես դադարեցրել է չվերթների ընդունումն ու իրականացումը:

Երկրի վարչապետ Սինձո Աբեն հայտարարել է, որ իշխանությունների համար առաջնային է բնակչության անվտանգության ապահովումը: