Հրաչյա Հարությունյանին մերժել են պայմանական վաղաժամ ազատ արձակել

Ռուսաստանում դատապարտված եւ պատիժը կրելու համար Հայաստան տեղափոխված հայ վարորդ Հրաչյա Հարությունյանի՝ պայմանական վաղաժամկետ արձակելու դիմումը դատարանը մերժել է: Այս մասին NEWS.am-ի հետ զրուցում ասաց Հրաչյա Հարությունյանը:

«Նույնիսկ չեմ էլ ճշտել, թե ինչ պատճառաբանությամբ են ինձ մերժել, բայց արդեն այդ որոշումը բողոքարկել եմ ՀՀ Վերաքննիչ դատարանում»,- ասաց նա:

Նա հավելեց, որ իր պատժի չափը լրանում է 1 տարի 9 ամիս հետո:

Հրաչյա Հարությունյանը նաեւ նշեց, որ բազմաթիվ առողջական խնդիրներ ունի, սակայն դեռ բուժումներ չի ստանում: Նախատեսում է ազատ արձակվելուց հետո զբաղվել առողջական խնդիրներով:

Հիշեցնենք, որ 2013թ. հուլիսին Հրաչյա Հարությունյանը Պոդոլսկի մերձակայքում բեռնատարով բախվել էր ուղեւորատար ավտոբուսին, ինչի հետեւանքով 18 մարդ էր զոհվել, ավելի քան 60 մարդ տարբեր աստիճանի վնասվածքներ էր ստացել: Հրաչյա Հարությունյանը Ռուսաստանում 6 տարի 9 ամիս ժամկետով ազատազրկման էր դատապարտվել: 2017թ. հուլիսի 20-ին Հրաչյա Հարությունյանը տեղափոխվել է Հայաստանի Հանրապետություն՝ «Դատապարտյալների փոխանցման մասին» 1983թ. եվրոպական կոնվենցիայով սահմանված կարգով պատժի մնացած մասը Հայաստանում կրելու համար: