Երևանի մանկապարտեզներում հիգիենիկ պարագաները գնվում են բյուջեով. ծնողներից գումար վերցնելու համար կպատժվի տնօրենը
Երևանի քաղաքապետարանի ենթակայության տակ գործող մանկապարտեզներում հիգիենիկ պարագաների համար ծնողներից գումարներ չվերցնելը պայմանավորված է բյուջեով ծախսերի ավելացմամբ: Ինչպես «Արմենպրես»-ի հետ զրույցում նշեց Երևանի քաղաքապետարանի հանրակրթության վարչության պետ Աննա Ստեփանյանը, ամիսներ առաջ ֆինանսական վերահաշվարկներ եղան, որի արդյունքում մանկապարտեզների բյուջեով հատուկ տող սահմանվեց հիգիենիկ պարագաների, տնտեսական ապրանքների ծախսերի համար:
«Եթե նախկինում ծնողների օգնությունը կամ այլ աջակցություն էր լինում, որ մանկապարտեզը ձեռք բերեր այդ պարագաները, ապա հիմա դրանց համար հատուկ տողով բյուջեով ծախս է նախատեսված: Այս փոփոխությունը կապված չէ հայաստանյան ներքաղաքական զարգացումների հետ: Այդ հանձնարարականը եղել է մի քանի ամիս առաջ, հաշվարկվել է, թե որքան գումար է անհրաժեշտ տնտեսական, հիգիենիկ պարագաների համար և բյուջեով ծախս է սահմանվել: Մեր կողմից գործընթացը վերահսկվում է»,-ասաց Աննա Ստեփանյանը:
Նրա խոսքով, իրենց նպատակն է մանկապարտեզներում բացառել նման խնդիրների համար որևէ դրամահավաք: Աննա Ստեփանյանը նշեց, որ վերջին ժամանակաշրջանում, կարծես թե, այդ առումով որևէ դժգոհություն չեն ստացել:
«Ամեն դեպքում, եթե կա որևէ մանկապարտեզ, որ նման պահանջ կներկայացնի ծնողներին, ապա տնօրենը կկրի պատասխանատվություն»,-ընդգծեց Աննա Ստեփանյանը:
Ինչ վերաբերում է դպրոցներում դրամահավաքի խնդրին, ապա Աննա Ստեփանյանը նշեց, որ վերջին զանգի հետ կապված դժգոհություններ եղան, վարչության աշխատակիցները գնացին խոսեցին ծնողների, ուսուցիչների հետ և պահանջեցին բացառել դրամահավաքությունը: Եթե գումար հավաքվել էր, ապա վարչության աշխատակիցները խնդրել են վերադարձնել: Դրանից հետո, դպրոցների հետ կապված ևս, Աննա Ստեփանյանը նշեց, որ առայժմ դժգոհություններ չունեն:
«Վերջին շրջանում դրամահավաք ասվածը շատ է արծարծվում, սոցիալական ցանցերում ով ում հետ խնդիր ունի պահն օգտագործում է և իրավիճակը հասնում է ճղճիմության: Ես կողմնակից եմ, որ ցանկացած դեպքում փոխադարձ հարգանքը մնա, լինի դա մանկավարժների, դաստիարակների, թե այլոց նկատմամբ: Իհարկե, եթե կան մանկավարժներ դաստիարակներ, որոնք իրենց աշխատանքը, դերը ճիշտ չեն կատարում, կարծում եմ, որ ժամանակն է չաշխատեն կրթական հաստատություններում: Ուզում եմ, որ ծնողական համայնքը վստահի մանկավարժին: Լինի դպրոց, թե մանկապարտեզ մենք պետք է վստահությամբ աշխատենք: Հորդորում եմ, եթե կան խնդիրներ դպրոցում, թե մանկապարտեզում, ապա բարձրաձայնվի տնօրենին, եթե չեն լուծվի, ապա մենք պատրաստ ենք լսելու և խնդրին լուծում տալու: Չի եղել մի դեպք, որ մենք չարձագանքենք խնդրին»,-հավելեց Աննա Ստեփանյան:
Երևանի քաղաքապետարանի ենթակայության տակ գործում է 161 մանկապարտեզ, 155 հանրակրթական դպրոց:
Մենք միանգամայն արժանիորեն դուրս եկանք հաջորդ փուլ
Մյունխենի կենտրոնում կառուցվել է փայտից պատրաստված հնգահարկ մանկապարտեզ
Հայաստանի համար Էբոլա հիվանդության ներմուծման և հետագա տարածման ռիսկը գնահատվում է ցածր
Գանսուի թռչող ձին. չինական նահանգի հնագույն ժառանգություն
Անգլիական ֆուտբոլում խտրականության ցանկացած դրսևորման համար կսահմանվեն 10-խաղյա որակազրկումներ
Արսեն Թորոսյանը ներկայացրել է սոցիալական պաշտպանության ոլորտում իրականացվող թվայնացման աշխատանքները
«Երևանի «Արարատ» կոնյակի-գինու-օղու կոմբինատ»-ը հանձնվել է ՀՀ կառավարմանն ու պահպանմանը. Գլխավոր դատ...
ԿԳՄՍՆ-ն՝ ի գիտություն «Սևանի շուրջը» սիրողական հեծանվային արշավին մասնակցությամբ հետաքրքրվողների
Wildberries-ն իրականացրել է աջակցող վճարումների երկրորդ փուլը
ՀԱՄԱՍ- ում հաստատել են զենքը վայր դնելու պատրաստակամությունը