Նիկոլ Փաշինյանն ընտրվեց վարչապետ. 59 կողմ, 42 դեմ

«Ելք» խմբակցության պատգամավոր, վարչապետի թեկնածու Նիկոլ Փաշինյանն ընտրվեց Հայաստանի վարչապետ։

Ազգային ժողովում կայացած հատուկ նիստում Նիկոլ Փաշինյանի թեկնածությանը կողմ են քվեարկել 59 պատգամավորներ, դեմ են քվեարկել 42 պատգամավորներ։

Թվատախտակի վրա կողմերի թիվը 58 էր, սակայն ԱԺ նախագահ Արա Բաբլոյանը նշեց, որ Գագիկ Ծառուկյանի կոճակը չէր աշխատել, եւ նրա ձայնը գումարվում է կողմերին։

Քվեարկությունից հետո Նիկոլ Փաշինյանը շնորհակալություն հայտենց եւ ասաց. «Ծառայում եմ ՀՀ ժողովրդին, ծառայում եմ Հայաստանի Հանրապետությանը»։

Նշենք, որ առաջադրվել էր վարչապետի մեկ թեկնածու՝ «Ելք» խմբակցության ղեկավար Նիկոլ Փաշինյանը։ ԱԺ «Ելք», «Ծառուկյան դաշինք» եւ ՀՅԴ խմբակցությունները հայտարարել էին, թե կողմ են քվեարկելու Փաշինյանի թեկնածությունը։ ՀՀԿ խմբակցության ղեկավար Վահրամ Բաղդասարյանը նշել էր, ՀՀԿ-ն դեմ է, սակայն հաշվի առնելով քաղաքական իրավիճակը, 10+1 պատգամավորներ կողմ են քվեարկելու։