Մեր որոշումն անկասկած արդարացված է. Սերժ Սարգսյանը` ԵԱՏՄ-ին անդամակցելու որոշման մասին

Հայաստանի Հանրապետության երրորդ նախագահ, Հայաստանի հանրապետական կուսակցության վարչապետի թեկնածու Սերժ Սարգսյանը ռուսական «Известия» պարբերականին տված հարցազրույցում անդրադարձել է 2015թ. Հայաստանի՝ Եվրասիական տնտեսական միությանն անդամակցելուն՝ պատասխանելով լրագրողին հարցին առ այն, թե ինչ է տվել երկրին անդամակցության 3 տարին:

«Այս հարցում ես կառանձնացնեի 2 բան՝ Հայաստանը միշտ էլ եղել է ինտեգրացիոն գործընթացների կողմնակից, քանի որ դրանք թույլ են տալիս ավելի արագ զարգանալ: Եվ երկրորդ՝ մենք միշտ կողմ ենք մեզ հետ համագործակցելու հարցում շահագրգիռ երկրների հետ սերտ հարաբերությունների հաստատմանը: Ուստի՝ փորձում ենք ակտիվ մասնակցել հետխորհրդային տարածքում ընթացող ինտեգրացիոն գործընթացներին՝ դրանով իսկ բազմապատկելով աճի հնարավորությունները: Ինչ վերաբերում է զուտ տնտեսական հարցերին, ապա մենք դարձել ենք ավելի քան 170 մլն սպառող ունեցող մեծ շուկայի մասը:

Այս դեպքում լավ աշխատանքով կարելի է մրցունակ դառնալ ու շահել դրանից: Ամեն դեպքում, 2016թ. մենք նկատեցինք դրական փոփոխություններ՝ ապրանքաշրջանառության աճի ցուցանիշը երկնիշ է: Իսկ 2017թ. Եվրասիական տնտեսական միության անդամների հետ մեր ապրանքաշրջանառությունն աճել է 26%-ով: ԵԱՏՄ անդամ երկրների հետ մեր արտահանման ծավալը 2016թ. աճել է 53,7%, իսկ 2017թ.՝ 41%-ով: Սրանք լավ ցուցանիշներ են, բայց չեմ ասում, որ իրավիճակը կատարյալ է»,-ասել է Սարգսյանը:

Իր խոսքում նա հավելել է, որ կազմակերպությունը դեռևս կազմավորման փուլում է, և բնական է, որ 2-3 տարվա ընթացքում հնարավոր չէր լինի կատարելության հասնել:

Պատասխանելով լրագրողին հարցին առ այն, թե ԵԱՏՄ շուկայում ու մասնավորապես Ռուսաստանում Հայաստանից արտահանված որ ապրանքներն են ամենաշատ պահանջարկ վայելում, Սարգսյանը նկատել է, որ «ցանկը բավական երկար է»:

«Միրգ-բանջարեղեն՝ ինչպես թարմ, այնպես էլ վերամշակված, հանքային ջրեր, կոնյակ, մշակված ալմաստներ, ոսկերչական իրեր, տրիկոտաժ, ծխախոտ, հիմա արդեն նաև դեղամիջոցները, լեռնահանքարդյունաբերության ոլորտի արտադրանքը: Մենք մեզ համար նպատակ ենք դրել մինչ 2022թ. հասնել արտահանման 40-45%, իսկ 2030թ.՝ մինչև 50% ցուցանիշի: Դա երկրին մակրոտնտեսական կայունություն կտա»,-ասել է Սարգսյանը:

Լրագրողի նկատառմանն առ այն, որ ժամանակին Հայաստանին առաջարկում էին Եվրոպական Միության հետ ասոցացում, սակայն երկիրը նախընտրեց ԵԱՏՄ-ին անդամակցելը, և արդյո՞ք այդ ընտրությունն արդարացրեց իրեն, Սարգսյանը պատասխանել է. «Մենք երբեք չենք փորձել օգուտ քաղել կոնֆլիկտներից և հակասություններից: Մենք միշտ բաց ենք խոսել մեր առաջնահերթությունների ու համոզմունքների մասին: Իրավիճակը, երբ երկխոսության միջոցով կարելի է առաջ շարժվել, ամենաբարենպաստն է: Գտնում եմ, որ մեր որոշումը, անկասկած, արդարացված է ինչպես տնտեսական, այնպես էլ մեր քաղաքացիների կողմից ունեցած աջակցության տեսանկյուններից»,-ասել է Սարգսյանը: