Ընտանիքն ամուր պահելու օգտակար կանոններ

Այս դժվարին ժամանակներում ամուր ընտանիք ստեղծելու հարցը հատկապես արդիական է: Բոլորս էլ բավական տխուր օրինակներ գիտենք, երբ հաջող եւ ամուր ընտանիքներն անսպասելիորեն քանդվում են: Բավական փորձառու ցանկացած կին հրաշալի գիտի, որ միայն ամուսնանալը բավարար չէ: Հարկավոր է նաեւ կարողանալ պահպանել ընտանիքը ծանր իրավիճակներում եւ սիրելի ամուսնուն հետ պահել հարբեցողությունից եւ դավաճանելու գայթակղությունից:

Ահա մի քանի պարզ կանոն.

1. Յուրաքանչյուր օրը սկսեք համբույրից: Որոշեք օրը սիրով սկսել:

2. Միշտ կրեք ձեր ամուսնական մատանին: Նրան թույլ տվեք ձեր կարգավիճակի տեսողական հիշեցումը լինել:

3. Շաբաթական գոնե մեկ անգամ ձեր կողակցի հետ ժամադրության գնացեք: Ձեր ժամանակի մի մասը միայն երկուսիդ հատկացրեք:

4. Ընդունեք ձեր կողակցի յուրահատկությունները: Փորձեք հիշել, թե ինչպես եք մի անգամ արդեն որոշել, որ համակրում եք ձեր կողակցի տարօրինակություններն ու սովորույթները: Դրանք փոխելու ձեր կարողությունները սահմանափակ են:

5. Հարգալից եղեք: Չե՞ք նկատել, որ ավելի հարգալից եք գործընկերների կամ խանութի վաճառողների հանդեպ, քան նրանց, ում սիրում եք: Լավ վերաբերմունք դրսեւորեք նաեւ տանը:

6. Քնքուշ եղեք: Կտրուկ խոսքերն ու գործողություններն այլեւս տեղ չունեն ձեր տանը: Բարի եղեք նրանց հանդեպ, ում սիրում եք, եւ ով ձեզ է սիրում:

7. Նվերներ մատուցեք: Եվ չնայած հայտնի է, որ կանանց լավագույն ընկերներն ադամանդներն են, նույնիսկ հաճելի բառերով փոքրիկ բացիկը կարող է հաճելի եւ ոչ պակաս թանկարժեք անակնկալ դառնալ:

8. Ավելի հաճախ ժպտացեք: Թող ձեր երջանիկ դեմքը ցույց տա ձեր վերաբերմունքը զուգընկերոջ հանդեպ: Հիշեք, թե ինչպես էիք նայում միմյանց, երբ խոստովանում էիք ձեր սիրո մասին:

9. Հպումներ: Մեջքը, այտերը, պարանոցը քնքուշ շոյելով՝ ցույց կտաք ձեր սերն ու կապվածությունը:

10. Միասին երազեք: Հանգիստ, հարմարավետ իրավիճակում խոսեք ձեր երազանքների մասին: Դա հաճախ արեք, եւ զարմանքով կհայտնաբերեք, թե որքան նման երազանքներ ունեք:

11. Չլուծված խնդիրներ կամ կոնֆլիկտներ մի թողեք: Եվ թող դա միանգամից չստացվի, մի՛ վախեցեք: Խնդիրն այսօր լուծելով՝ դուք քայլ եք անում դեպի երջանիկ ապագա:

12. Ծիծաղեք միասին: Ամեն օր որեւէ զվարճալի եւ ուրախ բան գտեք: Ձեր համատեղ կյանքը ծիծաղով լցրեք:

13. Ձեր կողակցի ցանկությունը կատարեք ավելի վաղ, քան նա կասի այդ մասին: Առաջ ընկեք նրա ցանկություններից:

14. Ձեր կողակցի պահանջմունքները ձեր սեփական հարմարավետությունից վեր դասեք:

15. Լսեք: Դուք չպետք է լուծեք խնդիրները, բավական է միայն ակտիվ ունկնդիր լինել: Անջատեք հեռուստացույցը, փակեք ամսագիրը եւ ամբողջ ուշադրությունը տրամադրեք ձեր կողակցին:

16. Գովեստի խոսքեր ասեք: Դա լավագույն աջակցությունը կլինի: Գովեստը վստահություն է հաղորդում եւ նպաստում է ավելի բարձր նպատակների հասնելուն:

17. Զանգահարեք ձեր կողակցին: Օրվա ընթացքում զանգահարեք միմյանց՝ պարզապես «Ողջույն» կամ «Ես քեզ սիրում եմ» ասելու:

18. Միմյանց ձեռք բռնեք: Միասին զբոսնեք կամ հեռուստացույց դիտեք՝ ձեռք-ձեռք բռնած:

19. Փորձեք հրաշալի տեսք ունենալ: Հին, տեսքը կորցրած հագուստ չի հագեք, մի ղեկավարվեք «այդպես հարմար է» սկզբունքով:

20. Ներողություն խնդրեք: Դա նույնքան հաճախ արեք, որքան սեր եք խոստովանում կամ քնքշություն ցուցաբերում: Ամուսնությունը խաղ չէ, որտեղ հաշիվ պետք է պահեք: Եվ երբեմն կարեւոր էլ չէ, թե ով է ճիշտ:

style.news.am