Ջիգարխանյանի երիտասարդ կինը նոր հարցազրույց է տվել (տեսանյութ)

ԽՍՀՄ ժողովրդական արտիստ Արմեն Ջիգարխանյանի՝ իրենից 44 տարով երիտասարդ կինը՝ Վիտալինա Ցիմբալյուկ-Ռոմանովսկայան, «Թող խոսեն» թոք շոուի ժամանակ կրկին խոսել է նախորդ տարվա հոկտեմբերից մինչև հիմա իրենց ընտանիքում շարունակվող սկանդալի շուրջ:

Հայտնի է, որ Ցիմբալյուկն ու Ջիգարխանյանը բաժանվել են դեռևս նոյեմբերին, սակայն դա փաստող փաստաթղթերը դեռևս չկան:

Վերջին երեք ամսում «Թող խոսեն»-ին տված առաջին հարցազրույցում 39-ամյա Ցիմբալյուկը նշել է, որ դեռևս սիրում է ամուսնուն, ուզում է հանդիպել նրան ու ամեն ինչ հանգիստ քննարկել:

Հաղորդավարի այն հարցին՝ արդյոք Ցիմբալյուկը սիրել է տարեց ամուսնուն, նա պատասխանել է. «Ես միանշանակ նրան սիրել եմ: Մեր սիրավեպը սկսվել է, երբ ես 20 տարեկան էի: Ես ամբողջովին տրվեցի նրան: Ինձ հաճախ մեղադրում են շահամոլ լինելու համար, սակայն չեմ հասկանում, թե ինչու: Նա իմ կարիքն ուներ, բայց երևի ոչ թե սիրում էր ինձ, այլ ուղղակի իմ կարիքն ուներ: Սիրե՞լ է, թե՞ ոչ. այս հարցի ճիշտ պատասխանը կարող է տալ միայն Արմեն Բորիսովիչը»,-ասել է դաշնակահարուհին:

Ցիմբալյուկը հայտարարել է, որ ամեն ինչ է եղել Ջիգարխանյանի համար, գիշեր-ցերեկ խնամել է նրան ու երկարացրել է նրա կյանքը:

«Եթե ես չլինեի, Արմեն Բորիսովիչը հիմա ողջ չէր լինի»,-ասել է Ցիմբալյուկը:

Երբ խոսք է գնացել Ջիգարխանյանի թատրոնի, գողացված միլիոնների ու հաստատության տնօրենի պաշտոնը զբաղեցնելու մասին, Ցիմբալյուկը խոստովանել է, որ ատում է թատրոնի դերասանական անձնակազմին՝ ստեղծված ճգնաժամային իրավիճակում իրեն չաջակցելու համար:

Նա հավելել է, որ չի յուրացրել թատրոնին պատկանող միլիոնները, քանի որ հաստատությունը պետական է, ու այնտեղից հնարավոր չէ անգամ մեկ ռուբլի ուղղել օֆշորներ: