Մենք վստահ ենք, որ ամերիկյան կողմը կշարունակի կենտրոնանալ խաղաղության օրակարգի վրա. Հաջիև

Ադրբեջանի նախագահի օգնական Հիքմեթ Հաջիևը հայտարարել է, որ Բաքվում վստահ են՝ ԱՄՆ-ի ապագա վարչակազմերը կշարունակեն զարգացնել Ադրբեջանի հետ ռազմավարական գործընկերությունը։

Հաջիևի խոսքով՝ վերջին երկու տարիներին Ադրբեջանին հաջողվել է ամրապնդել հարաբերությունները ԱՄՆ-ի, Չինաստանի և Եվրամիության հետ։ Նա նշել է, որ Վաշինգտոնի գագաթնաժողովը, բացի հայ-ադրբեջանական խաղաղության օրակարգից, հնարավորություն է տվել ԱՄՆ-Ադրբեջան հարաբերությունները բարձրացնել «որակապես նոր ռազմավարական մակարդակի»։

Նա նաև հայտարարել է, որ նախորդ ամերիկյան վարչակազմերի օրոք Բաքուն որոշակի դժվարություններ է ունեցել, իսկ Հարավային Կովկասի և Կասպյան տարածաշրջանի նկատմամբ, իր գնահատմամբ, բավարար ուշադրություն չի եղել։

Հաջիևը նշել է, որ Ադրբեջանը ցանկանում էր ԱՄՆ-ին վերադարձնել տարածաշրջան այնպիսի դերակատարությամբ, որը, Բաքվի գնահատմամբ, համապատասխանում է տարածաշրջանի նշանակությանը։

«Հետևաբար, մենք ցանկանում էինք Միացյալ Նահանգները վերադարձնել տարածաշրջան այնպիսի դերով և մոտեցմամբ, որը, մեր կարծիքով, համապատասխանում է դրա նշանակությանը։ Մենք վստահ ենք, որ ապագա վարչակազմերը կշարունակեն զարգացնել այս հարաբերությունները, և որ ամերիկյան կողմը կշարունակի կենտրոնանալ խաղաղության օրակարգի վրա և դրա միջոցով ներգրավվել տարածաշրջանում»,- ասել է Հաջիևը։

ԱՄՆ-ի և Ադրբեջանի միջև ռազմավարական գործընկերության մասին խարտիան ներառում է համագործակցություն նաև էներգետիկայի, առևտրի, տրանսպորտի, արհեստական բանականության, թվային ենթակառուցվածքների և անվտանգության ոլորտներում։