Լավագույնի կոչումը նոր նշաձող է (տեսանյութ)
Փրկարարի ծառայության մեջ սխալվելու իրավունք գրեթե չկա։ Այստեղ ամեն ինչ չափվում է վայրկյաններով․ մեկ վայրկյանի հապաղում, վրիպակ կամ անփութություն, և հետևանքները կարող են անդառնալի լինել։ Արագությունն ու ճշգրտությունը պարզապես մասնագիտական հմտություններ չեն, այլ երբեմն՝ մարդկային կյանք փրկելու վճռորոշ պայմաններ։
Հենց այս չափանիշներին հետևելու, ծառայության ընթացքում դրանք պատշաճ կիրառելու և բարձր պատրաստվածություն ցուցաբերելու արդյունքում էլ ՆԳՆ Փրկարար ծառայության Երևան քաղաքի փրկարարական վարչության թիվ 7 հրշեջ-փրկարարական ջոկատի 3-րդ խումբը 2025 թվականի արդյունքների ամփոփմամբ ճանաչվել է լավագույնը։
«2025 թվականին 3-րդ խումբն իրականացրել է 115-ից ավելի հրդեհաշիջման աշխատանք և սպասարկել 410-ից ավելի կենցաղային ու այլ փրկարարական ելք»,— նշում է խմբի պետ Գրիգոր Գրիգորյանը։
Խումբն իր ծառայությունը կազմակերպում է օրակարգին համապատասխան։ Հերթափոխը սկսվում է հանձնարարականներով․ ծառայողները հստակեցնում են անելիքներն ու պատասխանատվության շրջանակը։ Յուրաքանչյուրն ունի իր գործառույթը, իսկ արտակարգ իրավիճակում այդ գործողությունները միավորվում են մեկ ընդհանուր նպատակի շուրջ՝ արագ, հստակ և արդյունավետ արձագանքել ահազանգին։
Խմբի ուժեղ կողմերից մեկը թիմային գործելակերպն է։ Փորձառու ծառայողները նորեկներին ոչ միայն սովորեցնում են մասնագիտական հմտությունները, այլև ցույց են տալիս ինչպես գործել միասնական և արդյունավետ։
Թիվ 7 հրշեջ-փրկարարական ջոկատի հրամանատար Ահարոն Գևորգյանի խոսքով՝ 3-րդ խմբի հաջողության հիմքում կարգապահությունը, մասնագիտական պատրաստվածությունը, արագ, համակարգված գործելու կարողությունն ու թիմային աշխատանքի մշակույթն են։
Լավագույնի կոչումը, սակայն, չի դիտարկվում որպես վերջնական արդյունք։ Այն նոր նշաձող է, որը պետք է պահպանել յուրաքանչյուր հերթապահության, ահազանգի և առաջադրանքի ժամանակ։
Երբ հնչում է ահազանգը, այլևս չկա մրցակից, չկա երկրորդ հնարավորություն․ կա միայն վտանգը, ժամանակն ու թիմը, որը պետք է գործի արագ, հստակ ու անվրեպ։ Իսկ հրշեջ-փրկարարները լավ գիտեն՝ իրենց տեղը վտանգի պահին «առաջին գծում» է՝ մարդկանց կողքին, այնտեղ, որտեղ յուրաքանչյուր վայրկյան կարող է վճռորոշ լինել մարդու կյանքը փրկելու համար։
Գիտեմ, որ ճիշտ որոշում եմ կայացնում
Ջազ համերգ՝ Կասկադի տարածքում
Իրան այցի շրջանակում քննարկված մի շարք պայմանավորվածություններ իրականություն են դառնում
Firebird AI կենտրոնը կարող է օգտագործվել արևմտյան հատուկ ծառայությունների կողմից. Շևցով
Մարկո Ռուբիոյին կոչ են արել դադարեցնել Ադրբեջանին ցուցաբերվող ամերիկյան ռազմական աջակցությունը
Երբ դուրս ես գալիս խաղադաշտ, մտածում ես բացառապես հաղթանակի մասին
Իրանի նախագահը հայտարարել է, որ իր երկիրը լայնամասշտաբ պատերազմի վիճակում է
ՄԱԿ-ում վերահաստատվել է Հայաստանի աջակցությունը հատուկ իրավիճակներում գտնվող երկրներին
Երկրորդ սերնդի մոլորակ
«Ժողովրդավարությունը՝ որպես Հայաստանի խաղաղության ուղի». դեսպան Նարեկ Մկրտչյանի ելույթը ԱՄՆ-ում