Ինչ չի կարելի անել Նոր տարվա գիշերը

Շատերն առանց երկար մտածելու Նոր տարվա գիշերը մեխանիկորեն անում են քայլեր, անգամ չգիտակցելով ինչու են անում կամ թե ինչ հետեւանքներ այն կունենա: Նրանք պարզապես անում են այն, ինչ արել է պապը, հայրը կամ շեֆը:

Մեր փորձագետը մի քանի կետերով խորհուրդ է տալիս, թե ինչ չի կարելի անել Նոր տարվա գիշերը եւ հունվարի 1-ի առավոտյան.

1. Մի սնվեք այնպես, կարծես մի տարի ոչինչ չեք կերել:

2. Տոնը մի վերածեք հարբելու մրցության եւ լուսաբացից հետո գլուխ չգովեք, թե քանի շիշ օղի կամ կոնյակ եք խմել:

3. Ոչ մի դեպքում գիշերը չշտապեք ձեր աներհոր, զոքանչի կամ աներորդու տուն՝ նրանց շնորհավորելու համար: Հետեւանքները ծանր կլինեն ամբողջ տարվա ընթացքում: Պահեք ձեր արժանապատվությունը:

4. Աչքի տակով մի նայեք, թե ում սեղանին ինչ է դրված, որ հետո քննարկեք մտերիմների հետ:

5. Պարտադիր չէ գիշերվա ժամը երեքին կամ չորսին հարբած կամ սթափ վիճակում մտնել հարեւանների կամ ընկերների տուն եւ շնորհավորել նրանց Նոր տարին: Դա կարելի է անել նաեւ լույսը բացվելուց հետո:

6. Ձեզ մի ստիպեք այցելել նրանց տուն, ում դուռը մեկ տարվա ընթացքում այդպես էլ չեք բացել:

7. Ձեզ հյուր եկածներին մի պարտադրեք ուտել այս կամ այն ուտեստը, ասելով, թե սրանից հաստատ ձեր տանը չկա:

8. Ոչ մի դեպքում չասեք՝ սպաս (թանապուր) չլիներ՝ ուտեինք:

9. Ձեզ մի պարտադրեք նստել մինչեւ լուսաբաց. եթե ցանկանում եք քնել ժամը մեկին կամ երկուսին՝ քնեք, դրանում որեւէ ամոթալի քայլ չկա:

10. Սեղանին ոչ մի դեպքում չդնեք չկտրած անանաս, խոզի բուդ կամ հնդկահավ:

Շնորհավոր Նոր տարի, եղեք առողջ եւ արժանապատիվ:

Տես նաեւ լուսանկարը

Top-News.am-ի փորձագիտական բաժին