Արտահերթ խորհրդարանական ընտրություններ՝ Ճապոնիայում

Ճապոնիայում փետրվարի 8-ին անցկացվում են արտահերթ ընտրություններ՝ Ազգային ժողովի լուծարումից հետո։ Քվեարկությունը, նախնական տվյալներով, անցնում է առանց լուրջ խախտումների, սակայն երկրի հյուսիսում գրանցված ռեկորդային ձյան տեղումները կարող են բարդություններ առաջացնել որոշ շրջաններում։

Նախընտրական հարցումների համաձայն՝ նորընտիր վարչապետ Սանաե Տակաիչիի գլխավորած Լիբերալ-դեմոկրատական կուսակցության և նրա դաշնակիցների կոալիցիան կարող է ստանալ մինչև 300 մանդատ՝ խորհրդարանի 465 տեղից։

Վերլուծաբանները նշում են, որ ընդդիմությունը շարունակում է մնալ մասնատված և ներկայումս լուրջ վտանգ չի ներկայացնում իշխող կոալիցիայի համար։ Տակաիչին Ազգային ժողովը լուծարել էր պաշտոնը ստանձնելուց երեք ամիս անց՝ հույս դնելով իր բարձր վարկանիշի վրա։

Ընտրությունները երկրորդն են վերջին երկու տարիների ընթացքում և համարվում են վարչապետի համար քաղաքական ռիսկային քայլ։