Իսրայելի պաշտպանության բանակը հարվածներ է հասցրել Գազայի հատվածում

Իսրայելի պաշտպանության բանակը հայտնել է, որ գիշերը հարվածներ է հասցրել ՀԱՄԱՍ-Ի և Իսլամական Ջիհադի զինյալների թիրախներին Գազայի հատվածում։

ԻՊԲ-ի հաղորդմամբ՝ հարվածները հասցվել են զինյալ խմբավորումների հրամանատարներին, զենքի պահեստի, զենքի արտադրության օբյեկտի և երկու հրթիռային կայանքների ուղղությամբ։ Նշվում է, որ գործողությունը հաջորդել է հունվարի 30-ին Գազայի հարավում՝ Ռաֆահում, թունելից դուրս եկող ութ զինյալների դեմ իրականացված հարձակմանը։

Իսրայելի զինված ուժերի տվյալներով՝ հարվածների հետևանքով երեք զինյալ սպանվել է, ևս մեկը, որը բնութագրվում է որպես ՀԱՄԱՍ-ի ավագ հրամանատար, գերի է վերցվել։ Միաժամանակ, ՀԱՄԱՍ-ի կողմից վերահսկվող Գազայի առողջապահության նախարարությունը հայտնել է, որ հունվարի 31-ի գիշերը և առավոտյան Գազայի հատվածում յոթ տարբեր վայրերում իրականացված ավիահարվածների հետևանքով զոհվել է 32 մարդ։

Ըստ նախարարության՝ զոհերի թվում կան կանայք և երեխաներ, այդ թվում՝ Խան Յունիսում տեղահանվածների ճամբարում բնակվողներ։ Նշվում է նաև շուրջ 30 վիրավորի մասին, որոնցից մի քանիսը ծանր վիճակում են։

Իսրայելի զինվորականները հայտարարել են, որ Գազայի հատվածում գործող ահաբեկչական կազմակերպությունները համակարգված կերպով խախտում են միջազգային իրավունքը՝ քաղաքացիական ենթակառուցվածքները օգտագործելով ռազմական նպատակներով և գործելով խաղաղ բնակչության ներկայությամբ։ Այդ հայտարարությունը մեջբերում է The Times of Israel-ը։