Բարսելոնան 120 միլիոն եվրոյանոց առաջարկ է մերժել

«Բարսելոնան» հրաժարվել է վաճառել թիմի բրազիլացի եզրային հարձակվող Ռաֆինյային՝ մերժելով սաուդական «Նեոմ» ակումբի 120 միլիոն եվրոյի առաջարկը։ Այս մասին հայտնում է Fichajes-ը։

Ըստ աղբյուրի՝ արաբական ակումբի առաջարկը ներառում էր 100 միլիոն եվրո ֆիքսված վճար և ևս 20 միլիոն եվրո՝ որպես հավելավճար (բոնուս)։ Սակայն կատալոնական ակումբը նույնիսկ չի մտել բանակցությունների մեջ՝ հստակ հասկացնելով, որ ֆուտբոլիստը վաճառքի ենթակա չէ։

«Բարսելոնայի» ղեկավարությունը Ռաֆինյային դիտարկում է որպես թիմի առանցքային խաղացողներից մեկը։ Հանսի Ֆլիկի գլխավորությամբ բրազիլացին ոչ միայն ամրապնդել է իր տեղը մեկնարկային կազմում, այլև վայելում է մարզչական շտաբի լիակատար վստահությունը։ Ակումբում կարծում են, որ նման մակարդակի ֆուտբոլիստի վաճառքը կհակասի «Բարսելոնայի» ընթացիկ մարզական նախագծին և զարգացման ռազմավարությանը։ Ինքը՝ Ռաֆինյան, նույնպես հեռանալու ցանկություն չի հայտնել։ Ֆուտբոլիստը լիովին գոհ է թիմում իր դերակատարությունից և կենտրոնացած է բացառապես «կապտանռնագույնների» կազմում հաջող ելույթների վրա։

Ռաֆինյան «Բարսելոնայի» գույները պաշտպանում է 2022 թվականից՝ «Լիդսից» տեղափոխվելով 58 միլիոն եվրոյի դիմաց։ Ընթացիկ մրցաշրջանում նա բոլոր մրցաշարերում մասնակցել է 19 հանդիպման՝ դառնալով 11 գոլի և 5 գոլային փոխանցման հեղինակ։

armsport.am