Դատախազի տեղակալը չի կարող ՄԻՊ լինել, նա լավագույն դեպքում մարդու իրավունքների դատախազ կարող է լինել. Գեղամ Նազարյան

Մենք ՄԻՊ-ի առաջադրված թեկնածուի հարցը չենք քննարկել, ինքը մեզ հետ չի հանդիպել, իրեն չեմ ճանաչում, իր անձի կամ մասնագիտական որակների մասին չեմ կարող գնահատական տալ, բայց ինձ արդեն մտահոգում է, որ ՄԻՊ-ի թեկնածուն դատախազության աշխատակից: Այս մասին, այսօր՝ մարտի 22-ին, ԱԺ-ում NEWS.am-ի հետ զրույցում նշեց ԱԺ «Հայաստան» խմբակցության պատգամավոր Գեղամ Նազարյանը՝ անդրադառնալով նրան, որ նախօրեին ՔՊ-ն հայտարարեց, որ ՄԻՊ-ի իրենց թեկնածուն Անահիտ Մանասյանն է, որը այս պահին գլխավոր դատախազի տեղակալն է:

«Դատախազության աշխատակիցը բոլորին նայելու է դատախազի հայացքով, ինքը չի կարող ՄԻՊ դառնալ, ինքը լավագույն դեպքում մարդու իրավունքների դատախազ կարող է լինել: Ես հերթական անգամ ցավ եմ ապրում, որ գործող իշխանությունը չի կարողանում իրոք անկախ իրավապաշտպանի կամ մասնագետի առաջադրել այդ պաշտոնում»,-ասաց Նազարյանը:

Նա նկատեց, որ ՄԻՊ-ի համար միակ պայմանը չպետք է լինի լավ իրավաբան կամ մասնագետ լինելը. «Շատ կարեւոր է, թե նա ինչ գործոնեություն է ծավալել: Մարդը, որ երբեք մարդու իրավունքների պաշտպանությամբ չի զբաղվել, երբեք իր բողոքը չի հայտնել այս կամ այն դեպքի վերաբերյալ: Ինձ անկեղծ հետաքրքիր է՝ ինքն ի՞նչ կարծիք էունեցել, երբ կարմիր բերետավորները այս կամ այն մարդուն ծեծի են ենթարկել, ինքն արտահայտվե՞լ է այդ մասին: Չէր կարող կարծիք հայտնել, քանի որ ինքը դատախազի տեղակալ է եղել, դատախազի տեղակալը ոնց կարող է ՄԻՊ դառնալ, չի կարող: Ոնց որ հայտնի որսորդին նշանակենք բնապահպանների միության նախագահ, նա կենդանիների պաշտպան չի կարող լինել: Ինքն ինչքան էլ ուզի, աշխարհին այլ աչքերով եւ այլ անկյունից է նայելու»,-ասաց ընդդիմադիր պատգամավորը:

Գեղամ Նազարյանը նեւ հիշատակեց, որ օրենքի պահանջն է, որ ՄԻՊ-ը պետք է հանրության կողմից ճանաչելի լինի. «Հիմա ինքը ճանաչելի՞ է: Կարող եք դուրս գալ փողոց, ցանկացած 100 հոգու հարցնել՝ Անահիտ Մանասյանին ճանաչո՞ւմ եք: Իրեն հաստատ չեն ճանաչի»: