Ադրբեջանցիները ցանկանում են, որ ռուսները ներկայություն չունենան ոչ Հայաստանում, ոչ էլ Արցախում. Շավարշ Քոչարյան

Ադրբեջանական սադրանքների հիմնական նպատակը մեկն է՝ դադարեցնել մեր տարածաշրջանում ռուսների ռազմական ներկայությունը: Այս մասին 168.am-ի հետ զրույցում ասել է Հայաստանի նախկին փոխարտգործնախարար Շավարշ Քոչարյանը:

«Ակնհայտ է, որ սադրանքները շարունակվելու են, եւ իրենց համար էական չէ՝ դա կանեն լրագրողի, թե բնապահպանի դրոշի տակ: Նպատակը միանշանակ մեկն է՝ արցախցին պետք է հեռանա իր հողից եւ ուղղված է ռուս խաղաղապահներին: Սրա հետեւանքով խաղաղապահը հայտնվում է հիմար վիճակում, երբ բնապահպանի նկատմամբ զենք օգտագործել, բնականաբար, չի կարող, մյուս կողմից էլ իրենք իրենց շատ սանձարձակ են պահում Բաքվի հրահանգով»,- նշում է Քոչարյանը:

Շավարշ Քոչարյանը կարծում է՝ կատարվողն ածանցյալն է հիմնական քաղաքական կուրսից, որն ընտրել է իշխանության եկած քաղաքական ուժը, այն է՝ արտաքին վեկտորի փոփոխություն:

«Արտաքին վեկտորի փոփոխությունը ոչ թե նշանակում էր Ռուսաստանից դեպի Արեւմուտք, այլ Ռուսաստանից դեպի Թուրքիա: Սա նշանակում է՝ ռուսները պետք է հեռանան Արցախից, նրանց ռազմական ներկայությունը պետք է չլինի ոչ Հայաստանում, ոչ էլ Արցախում: Սա ենթադրում էր նախօրոք ծրագրված պարտությամբ պատերազմ Արցախում, հիմա էլ նշանակում է ռուսների հեռանալը՝ չսպասելով 2025 թվականին: Այս ամենը խորանալու է ու ստեղծելու անտանելի պայմաններ արցախցիների համար, հատկապես, որ առջեւում ձմեռ է: Պետք է հիշենք, որ այս ամենը տեղի է ունենում միջազգային շահի փոփոխության պայմաններում, որն ավելի հանդուգն է դարձնում այն խաղացողներին, որոնք հստակ շահեր են հետապնդում: Այս իրավիճակում ռուսական կողմը փայլուն հասկանում է՝ ինչ է կատարվում: Ինքն ունի իր շահերը եւ պատրաստ է դրանք պաշտպանել»,- ընդգծում է Քոչարյանը:

Ըստ Քոչարյանի՝ ՀԱՊԿ-ում եղած պետությունների միջեւ միշտ են եղել անհամաձայնություններ, եւ միշտ հարց է եղել, թե որքանով պետք մեզ ՀԱՊԿ-ը: Բացատրությունները ծանրակշիռ են եղել՝ Հայաստանը շատ արտոնյալ պայմաններով կարողանում է ձեռք բերել ռազմատեխնիկա, մասնակցել զորավարժությունների: Նվազում է համագործակցության այն աստիճանը, որը կազմակերպության անդամ ադրբեջանամետ պետությունները կարող են ունենալ Ադրբեջանի հետ:

«Եվ որ ամենակարեւորն է՝ եթե ռազմական հարձակման դեպքում մենք օգնության ակնկալիք ունենք Ռուսաստանից, պետք է հասկանանք, որ անգամ ամենաուժեղ պետությունը միշտ կձգտի ոչ թե սեփական դրոշի, այլ որեւէ կազմակերպության անունով ռազմական օգնություն ցույց տալ: Երբ Ռուսաստանին պետք է, ինքն օգտագործում է ՀԱՊԿ-ի դրոշը եւ դրա ապացույցը Ղազախստանն է, երբ նա օգնություն ցուցաբերեց ոչ թե իր, այլ կառույցի անունից: Այնպես որ, երբ մենք հարվածում եքն ՀԱՊԿ-ին, հարվածում ենք Ռուսաստանին եւ նրա հնարավոր աջակցությանը մեզ: Մենք տակից քայքայում ենք մեր եւ Ռուսաստանի հնարավոր ռազմական համագործակցությունը»,- ասում է Քոչարյանը: