Արդարադատնախարարը պահանջում է պատժել Մնացական Մարտիրոսյանին՝ Գագիկ Ջհանգիրյանի եղբորը 13 տարի առաջ դատապարտելու համար

ՀՀ արդարադատության նախարարությունը պահանջում է պատժել Երևանի ընդհանուր իրավասության դատարանի դատավոր Մնացական Մարտիրոսյանին՝ ՀՀ նախկին զինդատախազ, ԲԴԽ նախագահի նախկին պաշտոնակատար Գագիկ Ջհանգիրյանի եղբորը՝ Վարդան Ջհանգիրյանին, դեռևս 13 տարի առաջ մեղավոր ճանաչելու և ազատազրկման դատապարտելու համար, գրում է pastinfo.am-ը:

Հիշեցնենք, որ Վարդան Ջհանգիրյանը 2009թ. մարտի 31-ի դատավճռով մեղավոր է ճանաչվել ՀՀ քրեական օրենսգրքի 316-րդ հոդվածի 1-ին մասով: Դատարանը հաստատված է համարել, որ 2008թ. փետրվարի 23-ին` ժամը 23-ի սահմաններում, ՀՀ ոստիկանության աշխատակիցների կողմից Էջմիածին-Երևան մայրուղու Արգավանդ գյուղի խաչմերուկում, «BMW X-5» մակնիշի ավտոմեքենայում գտնվող զինված անձանց զինաթափելու և բերման ենթարկելու ժամանակ նա չի ենթարկվել` չշարժվելու մասին իր ծառայողական պարտականությունները կատարող ոստիկանի օրինական պահանջին, ավտոմեքենան վարել է նրանց ուղղությամբ և բախվել ոստիկանության ավտոմեքենային, չի ենթարկվել իր մոտ պահվող հրազենը ներկայացնելու պահանջներին, վնասել է ոստիկանի համազգեստը, բռունցքով հարվածել վերջինիս դեմքին` պատճառելով առողջության թեթև վնասի հատկանիշներ չպարունակող մարմնական վնասվածքներ:

Դատավճռով Վ.Ջհանգիրյանը դատապարտվել է երեք տարի ժամկետով ազատազրկման, նշանակված պատիժը պայամանականորեն չի կիրառվել՝ սահմանվելով երեք տարի ժամկետով փորձաշրջան։ Վերաքննիչ դատարանն անփոփոխ է թողել դատավճիռը, Վճռաբեկ դատարանը՝ վարույթ չի ընդունել բողոքը: Վարդան Ջհանգիրյանը հետագայում ազատվել է պատժից՝ համաներմամբ:

2018թ ՀՀ-ում իշխանափոխությունից հետո 2008թ իրադարձություններին վերաբերող մի շարք աղմկահարույց գործերով կայացված դատական ակտերը վերանայվել են, այդ թվում՝ Վարդան Ջհանգիրյանին առնչվող գործով: 2020թ ՀՀ գլխավոր դատախազ Արթուր Դավթյանը վճռաբեկ բողոք է ներկայացրել՝ պահանջելով բեկանել նախկինում կայացված դատավճիռները և արդարացնել Վ. Ջհանգիրյանին: ՄԻԵԴ-ի կողմից ևս կայացվել է վճիռ, համաձայն որի՝ խախտվել են Վարդան Ջհանգիրյանի իրավունքները:

Հենց ՄԻԵԴ վճռի հիման վրա էլ դատավոր Մնացական Մարտիրոսյանի նկատմամբ կարգապահական վարույթ է հարուցվել: «Փաստինֆո»-ի հաղորդմամբ` ՀՀ արդարադատության նախարարությունը միջնորդություն է ներկայացրել ԲԴԽ՝ Մնացական Մարտիրոսյանին կարգապահական պատասխանատվության ենթարկելու մասին, որը կքննվի օգոստոսի 25-ին:

Հատկանշական է, որ դատավոր Մնացական Մարտիրոսյանին բոլոր ժամանակներում «վստահվել են» քաղաքական զգայունություն ունեցող քրեական գործերը, որոնցով վերջինս մշտապես կայացրել է մեղադրական դատական ակտեր: Հենց Մնացական Մարտիրոսյանի դատավճռով է Նիկոլ Փաշինյանը մեղավոր ճանաչվել և դատապարտվել ազատազրկման, այժմ էլ՝ Մարտիրոսյանը շարունակում է քննել զգայուն գործերը՝ կատարելով արդեն այս իշխանությունների, ի դեմս Փաշինյանի, ցանկությունները:

Ի դեպ, Նիկոլ Փաշինյանի գործով ևս Վճռաբեկ դատարանն էլ՝ արդարացրել նրան, ՄԻԵԴ-ն էլ արձանագրել է իրավունքի խախտում, ինչը թերեւս սպասելի էր, քանի որ կառավարության ներկայացուցիչը հակափաստարկներ որպես այդպիսիք չի ներկայացրել գործող վարչապետի` Փաշինյանի դեմ: Հետևաբար, չի բացառվում, որ Նիկոլ Փաշինյանի վերաբերյալ կայացված վճիռը, ի թիվս այլ հանգամանքների, նույնպես Մարտիրոսյանի դեմ դարձել է մահակ, հատկապես, որ օրենսդրական փոփոխություններից հետո ՄԻԵԴ վճիռնբերը կարող են որպես հիմք դիտարկվել՝ դատավորին կարգապահական պատասխանատվության ենթարկելու, ընդհուպ՝ լիազորությունները դադարեցնելու համար:

Նկատենք` նշված կարգավորումն ունի նաև հետադարձ ուժ և տարածվում է վերջին 15 տարիների ընթացքում կայացված ակտերի վրա: Ի դեպ, օրենսդրական նշված փոփոխությունների առնչությամբ Վենետիկի հանձնաժողովը և մասնագիտական հանրությունը տվել է բացասական կարծիք, սակայն օրենսդրական փոփոխություններն, այդուհանդերձ, կատարվել են: