Բժիշկ-պատգամավոր Չարչյանը հակադարձում է առողջապահության իրավաբան նախարարին
Առողջապահության նախարար Անահիտ Ավանեսյանը հունիսի 7-ին, լրագրողների հետ ճեպազրույցի ժամանակ անդրադարձել էր ոստիկանության այս օրերի գործողություններին, հատուկ միջոցների կիրառումներին, որոնց արդյունքում բազմաթիվ քաղաքացիներ վնասվածքներով տեղափոխվել էին հիվանդանոցներ։ Նախարար Ավանեսյանն ասել էր․ «Կարող եմ ասել, որ այս ամբողջ ընթացքում ոստիկանական ուժերը և բոլորը առհասարակ գործում են խիստ ժողովրդավարական օրենքների տառին համաձայն, իրենց ծառայությունը իրականացնում են ամենայն պատշաճությամբ։ Պետք է նշել, որ իսկապես երբեմն զարմանում եմ մեր ոստիկանների համբերության և նրանց պինդ նյարդերի վրա, նրանք փայլուն ծառայություն են իրականցանում, նաև շնորհակալություն եմ հայտնում նրանց»։
«Ինչպե՞ս եք վերաբերում առողջապահության նախարարի այս հայտարարությանը, որով նա, փաստորեն, ողջունում է կամ գոնե չի դատապարտում ոստիկանների գործողություններին, որոնց արդյունքում քաղաքացիները տեղափոխվում են հիվանդանոց»,- Yerevan.Today-ը հարցրեց բժիշկ-պատգամավոր, պրոֆեսոր Արմեն Չարչյանին։
«Կցանկանայի բանավիճել տիկնոջ հետ այն բոլոր վնասվածքների կապակցությամբ, որոնք խաղաղ ցուցարարները, ցավոք, ստացել են ոստիկանների կողմից բռնի ուժի կիրառման հետևանքով: Համոզված եղեք, որ գանգոսկրի կոտրվածքները, ծնոտոսկրի կոտրվածքները, վերին վերջույթների կոտրվածքները և հոդախախտերը, ստորին վերջույթների հրազենային, բեկորային վնասվածքները առաջացել են մեր ոստիկանների ոչ «պինդ նյարդերի և փաղաքշական» գործունեության հետևանքով: Անձամբ այցելել եմ հիվանդանոցում ստացիոնար բուժում ստացող անձանց:
Կրկնեմ՝ սրանք բիրտ, անհամաչափ ուժի կիրառման հետևանք են: Հարյուրավոր սալջարդերի, արյուանզեղումների և այլ թեթև վնասվածքների մասին էլ չեմ ուզում խոսել:
Սակայն, բանավեճն իր հետ անհնարին է՝ բժշկական ոլորտում իր մասնագիտական գիտելիքների ոչ բավարար լինելու պատճառով: Նա, որպես իրավաբան, ավելի լավ կլինի իրավական գնահատական տա համացանցում և ամենուր տարածված այն բազմաթիվ փաստերին՝ վիդեոնյութեր, նկարներ և այլն, որտեղ ակնհայտ երևում է ոստիկանների կողմից բիրտ ուժի կիրառումը, որի հետևանքով մեր բազմաթիվ հայրենակիցներ ստացել են թեթև, միջին և ծանր աստիճանի վնասվածքներ»,- մեզ հետ զրույցում ասաց Արմեն Չարչյանը։
Շիրակցի դպրոցականները մեկնել են ամառային հանգստի՝ դեպի «Արագած» ճամբար
Երևանում մի քանի փողոցներում կփոխվի երթևեկության կազմակերպումը
Առաջին դասարանցիների առցանց ընդունելությունը՝ նոր կանոններ, նոր մարտահրավերներ
Մեծացել է ռուբլու առքի և վաճառքի տարբերությունը․ ի՞նչ վտանգներ կան բանկային համակարգի համար
Գալուզինը կասկածի տակ է դնում եվրոպական շուկաների՝ Հայաստանի համար այլընտրանք լինելը
ՀՀ ԱԺ արտահերթ նստաշրջան - 02.07.2026
Վենեսուելայի երկինքը կարմրել է երկրաշարժից հետո (տեսանյութ)
Հայաստանի և Ադրբեջանի քաղաքացիները կկարողանան գաղտնի տեղեկատվություն տրամադրել անհայտ կորածների և հն...
Կասեցվել է «Թամարա» ապրանքանիշի երեք արտադրատեսակների արտադրությունը
Ռուսաստանում ուժի մեջ է մտել ԱՊՀ-ից և Վրաստանից բեռնատարների հեռագնաց վարորդների՝ մինչև 180 օրով մնա...