«Հրապարակ». Կազմակերպված մրոցի. Ենթադրվում է, որ մարտավարությունը Փաշինյանն է մշակել

«Հրապարակ» թերթը գրում է. «Երեկ ՔՊ-ական պատգամավորներն ԱԺ-ում հայտարարությունների ժամը նվիրեցին ընդդիմադիրներին, ավելի ճիշտ՝ զբաղված էին նրանց մրոտելու, սկսված պայքարը վարկաբեկելուն ուղղված հակաթեզեր տարածելու գործով։ Օրինակ, թիվ մեկ ուսապարկ Վահագն Ալեքսանյանը հայտարարեց, թե ՀՀ 2-րդ նախագահի որդին թիկնապահների ու ֆիթնես մարզիչի հետ է փողոց փակում։ Ոմն անհայտ Լիլիթ Կիրակոսյան, որի առաջին բեմելն էր երեկ, ԱԺ ամբիոնից հայտարարեց, թե մի խումբ քաղաքացիներ իրենց «պահանջագիր» են փոխանցել՝ առ այն, թե ԱԺ ընդդիմադիրները մինչեւ ե՞րբ պիտի իրենց հարկերից գոյացած գումարներով աշխատավարձ ստանան, սակայն պարբերաբար բացակայեն խորհրդարանից։

Երրորդն էլ Հռիփսիմե Գրիգորյան անունով պատգամավորն էր, որը ծաղրում էր ընդդիմության քարոզչական կարգախոսը եւ ասում, որ ընդդիմության պայքարը բովանդակազուրկ է։ «Լաոն չի զարթնում, «ջհանդամ» զարթնի՞»,- հռետորական հարց էր հնչեցնում նա՝ ակնարկելով, թե ընդդիմությունը ծաղրում է պայքարին չմիացողներին։

Մեր տեղեկություններով՝ ՔՊ խմբակցության աշխատանքը կոորդինացողները առավոտ կանուխ պատգամավորներին զգուշացրել էին՝ իրենց էջերում գրառումներ չանել, ելույթներ չունենալ, քանի որ հայտարարությունների ժամին ինչ պետք է, կասվի։ Ենթադրվում է, որ մարտավարությունը Փաշինյանն է մշակել, եւ ելույթների լեյտմոտիվն էլ նա է որոշել»: