Կենտրոնով ման էի գալիս, ՍԱՍ-ի ու Ամիրյանի արանքը կենտրոն են սարքել. ի՞նչ եք անում դրա հետ. Հրաչյա Սարգսյան

Երեւանի քաղաքապետարանի գործակարգավարական խորհրդակցության նիստին քաղաքապետարանի առեւտրի եւ ծառայությունների վարչության պետ Հովիկ Սաֆարյանն ասաց, որ փողոցային առեւտրի հետ կապված տեսչական մարմինը գրեթե ոչ մի լիազորություն չունի, հատկապես ֆիզիկական անձանց նկատմամբ որեւէ վարչարարություն չենք կարողանում իրականացնել: 

Քաղաքապետ Հրաչյա Սարգսյանը հարցրեց. «Կենտրոնով ման էի գալիս, ՍԱՍ-ի ու Ամիրյանի արանքը ինչ-որ մեկը առեւտրային կենտրոն է սարքել: Վստահ եմ, որ ոչ թե ընտանիք է պահում, այլ բիզնես է դրել։ Ի՞նչ ենք անում դրա հետ»։

Սաֆարյանը պատասխանեց, որ ճանաչում են այդ անձնավորությանը, արդեն 10 մլն դրամից ավել տուգանել են բազմիցս: Նաեւ ասաց, որ պայմանավորվել են ոստիկանության հետ, ուժեղացված ծառայություն ենք այս շաբաթ սկսում։

Հրաչյա Սարգսյանն էլ արձագանքեց.
«Մայթը վերցրել են, քաղաքացիների ազատ տեղաշաժը խանգարում են: Կարծում եմ՝ քաղաքացիների ազատ տեղաշարժը խանգարելու հիմքով կարելի է կազմակերպել, որ այդտեղ այլեւս առեւտուր չիրականացվի: Մի քիչ էլ թողենք, ապօրինի շինություն կսարքի մայթի վրա»։