Եկամուտները թաքցնող պաշտոնյաները կպատժվե՞ն. ովքեր են հայտնվել թիրախում

Կոռուպցիայի կանխարգելման հանձնաժողովը հրապարակել է հայտարարագիր ներկայացնելու պարտականություն ունեցող այն պաշտոնատար անձանց ցուցակը, որոնք «Հանրային ծառայության մասին» օրենքով սահմանված ժամկետում չեն ներկայացրել համապատասխան հայտարարագրերը:

Սույն հղումով ներկայացված է հայտարարագրման պարտավորությունն օրենքով սահմանված ժամկետում չկատարած առաջին խումբ պաշտոնատար անձանց ցուցակը։ Հանձնաժողովի ծանուցման հիման վրա ծանուցմամբ նշված ժամկետներում հայտարարագրերը չներկայացնելու դեպքում, հարուցվելու են վարչական իրավախախտման վերաբերյալ գործի վարույթներ, որոնց արդյունքում կարող է կիրառվել վարչական տույժ՝ նվազագույն աշխատավարձի երկուհարյուրապատիկի (200 000 ՀՀ դրամի) չափով: Նշված հիմքերով վարույթներ կհարուցվեն հայտարարատու պաշտոնատար անձանց ընտանիքի անդամների («Հանրային ծառայության մասին» օրենքի իմաստով ընտանիքի կազմի մեջ մտնող անձանց) նկատմամբ:

Իսկ այժմ տեսնենք, թե ինչ ուշագրավ անուններ կան այդ ցանկում: Եվ այսպես, հայտարարագիր չեն ներկայացրել ՀՀ էկոնոմիկայի նախարար Վահան Քերոբյանը, քաղաքաշինության կոմիտեի նախագահի տեղակալ Նունե Պետրոսյանը, Շիրակի մարզպետի տեղակալ Պողոս Աբրահամյանը, Մարսելում ՀՀ գլխավոր հյուպատոս Վարդան Սրմաքեշը, ԲԴԽ անդամ Արմեն Հայկյանցը, Արմավիրի մարզի դատախազության դատախազ Նշան Մաթևոսյանը,Նորք Մարաշ վարչական շրջանի ղեկավարի տեղակալ Գագիկ Աբաջյանը և այլք: Խոսքը վերաբերվում է թե դեռևս պաշտոնավարող, թե արդեն պաշտոնին հրաժեշտ տված անձանց, ինչպես նաև թե պաշտոնը ստանձնելու, թե տարեկան հայտարարագրերին:

Հարց է առաջանում` արդյո՞ք սույն պաշտոնյաները զգուշացումից հետո էլ հայտարարագրերը չներկայացնելու դեպքում կտուգանվեն, թե սովորականի պես իշխանությունները կներեն յուրայիններին և նրանց խախտումների հանդեպ լոյալ կգտնվեն: Մյուս կողմից հարկ է ընդգծել, որ անգամ եթե վերջիններս այդպես էլ չներկայացնեն իրենց հայտարարագրերը, ապա միևնույն է շահողի կարգավիճակում են լինելու, քանի որ պաշտոնյան կարող է թաքցնել հանրությունից 10 միլիոն դրամի եկամուտ՝ վճարելով ընդամենը 200 հազար դրամի տուգանք:

lurer.com