Հայոց լեզվից քննություն հանձնածը ընդունվել է կիրառական մաթեմատիկայի ֆակուլտետ, սա զավեշտ է

Նամակ է գալիս դիմորդներին, թե ընդունվել եք այս կամ այն ֆակուլտետ, բայց երկու ժամ չանցած կրկին հաղորդագրություն է գալիս, թե չէ, չեք ընդունվել։ Նման բաներ են տեղի ունենում, հասկանու՞մ եք։ Ազգային ժողովում պատգամավորների հետ հանդիպման ժամանակ ասաց ԵՊՀ իրավագիտության ֆակուլտետի դիմորդ Հայկ Բաբալյանը, որը պայքարում է երկրորդ հայտով միջազգային հարաբերություններ ընդունվելու համար։

Նա նաև հայտարարեց , թե դեպքեր են եղել, երբ Հայոց լեզու և հայ գրականություն առարկայից քննություն հանձնած դիմորդը ընդունվել է, ասենք, կիրառման մաթեմատիկայի ֆակուլտետ։
«Սա ուղղակի զավեշտ է։ Եթե կհետաքրքրի, ես անձնական նամակով կուղարկեմ»,- պատգամավորին ասաց դիմորդը, թեպետ հավելեց, որ այս մասով գոնե շտկումներ եղել են։

«Հիմա այն, ինչ ասում է Հայկը, ցույց է տալիս, որ իրենք մեկ տեղ չէ, որ խախտում են արել, շատ ու շատ տեղեր խախտումներ են եղել։ Սրանք արդեն ԳԹԿ- ի գործառույթներ են եղել»,- ասաց դիմորդ Հայկ Բաբալյանի հայրը՝ Մասիս Բաբալյանը։