Թանկացումներ դեղերի շուկայում. քաղաքացիներին ահազանգում են՝ դեղատներում ցինկ կամ երկաթ չկա

«Ժողովուրդ» օրաթերթը գրում է․ «Հայաստանում դեղերի շուկայում որոշակի թանկացումներ են արձանագրվել: «Ժողովուրդ» օրաթերթը փոքրիկ շրջայցի ընթացքում պարզեց, որ զգալի բարձրացել է ճնշման համար կիրառվող «Նորմոդիպին» կոչվող դեղը: Տվյալ դեղի 10 մգ֊անոցի մեկ հատիկը 110 դրամից թանկացել է՝ դառնալով 230 դրամ, իսկ, ահա, 5 մգ-անոցի մեկ հատիկը վաճառվում է 120-130 դրամով: Նշենք նաեւ որ «Վալերիանա» (Կատվախոտ) գիշերային դեղի հատիկների տուփը 290-300 դրամից թանկացել է՝ դառնալով 350 դրամ: Իսկ «Վալերիանայի» մյուս՝ հանրությանը հայտնի դեղին հատիկները 90 դրամի փոխարեն այժմ վաճառվում է 100-120 դրամ:

Թանկացել է նաեւ խոլեստերինի դեմ կիրառվող «Ատորիս»-ը. 30-հատանոց տուփը 3150 դրամից դարձել է 3300 դրամ: Ցավազրկող «Տեմպալգին» դեղամիջոցի 20 հատանոց տուփը 700 դրամից թանկացել է՝ դառնալով 840 դրամ: Տեղեկացնենք, որ D վիտամինի հատիկներն են 20 դրամով թանկացել՝ 100-ից դառնալով 130 դրամ: Բարձրացել է նաեւ C վիտամինի գինը. մեկ հատիկը նախկինում 120 դրամով էր վաճառվում, այժմ՝ 140 դրամ: Ի դեպ, նկատենք, որ դեղատներում C վիտամինի ոչ բոլոր միլիգրամներն են առկա: «Ժողովուրդ» օրաթերթը չի դադարում քաղաքացիներից հեռախոսազանգ ստանալ այն մասին, որ հայաստանյան դեղատներում ցինկ կամ երկաթ չկա, մինչդեռ կորոնավիրուսի դեմ պայքարում ամենակարեւոր եւ պահանջվածը ցինկն է. այս հանքանյութն օգնում է վիրուսային վարակներին դիմագրավելու հարցում։ Մեկ շաբաթ առաջ «Ժողովուրդ» օրաթերթը գրել էր նաեւ, որ դեղատներում հակաբիոտիկների դեֆիցիտ է: Երեկ մեզ հայտնի դարձավ, որ որոշ դեղատներ լուծել են այս հարցը՝ ավելացնելով հակաբիոտիկների իրենց պաշարները, ավելին՝ գներն էլ փոքր-ինչ նվազեցրել են»:

Մանրամասները՝ «Ժողովուրդ» օրաթերթի այսօրվա համարում