Հայոց լեզու և գրականություն առարկաների չափորոշիչների հանձնախմբի ղեկավարը պատասխանել է իրենց ուղղված քննադատություններին

Հայոց լեզու եւ գրականություն առարկաների չափորոշիչների հանձնախմբի ղեկավար Թամար Ալեքսանյանը ֆեյսբուքյան իր էջում դիմել է ուսուցիչներին՝ խնդրելով նրանց օգնությունն ու խոսքը՝ հանձնախմբի կատարած աշխատանքի վերաբերյալ:

Նա մասնավորապես գրել է.

«Սիրելի՛ ուսուցիչներ, դիմում եմ միայն ձեզ, այսինքն՝ նրանց, ովքեր ամեն օր, ամեն ժամ կանգնում են աշակերտի դիմաց...

Մեր ակադեմիական այրերը հայոց լեզվի ճոխ գանձարանից միայն վատ բառեր են սովորել եւ անընդմեջ լուտանք են թափում մեր հանձնախմբի գլխին: Իհարկե, խոսքը բոլորի մասին չէ. կան պարկեշտ գիտնականներ, որոնք իրենց տեղին դիտարկումներով օգնում եւ սատարում են մեզ եւ առաջարկություններ են անում՝ օգնելով մեզ լրացնելու եւ շտկելու ընդամենը սեւագիր այս տարբերակը:

1. Մեր հանձնախումբը չի ընդունում վատ նվերներ, հետեւաբար բոլոր անվայել արտահայտությունները թողնում է հասցեատերերին:

2. Սա այն պահն է, որ ուսուցչությունը պիտի բռունցքվի եւ ասի իր խոսքը: Տարիներ շարունակ այս այրերը, փոխանակ գիտությամբ զբաղվելու եւ հայ բանասիրական միտքը ճոխացնելու, զբաղված են դպրոցի եւ մանկավարժության գործերին միջամտելով:

3. Նրանց թեթեւ ձեռքով կազմվել են գրականության ծրագրեր, որոնք հեղինակներով են լեցուն, որոնք աշակերտին դարձնում են թութակ, որոնք պարտադրում են մեր երեխաներին կրկնելու նրանց «իմաստուն» մտքերը այս կամ այն գրողի մասին՝ ժամանակ չտալով եւ թույլ չտալով աշակերտին կարդալ, հասկանալ գրական տեքստը, քննել, համեմատել, ինքնուրույնաբար /ուսուցչի ուղղորդումով/ ուսումնասիրել, գտնել հեղինակի ասելիքը, գյուտեր անել եւ սովորել սիրել գիրքը եւ ընթերցանությունը:

4. Այս այրերի թեթեւ ձեռքով պարտադրվեցին դպրոցին եւ աշակերտին շտեմարաններ, որոնք իրենք եւս առանց օգնության չեն կարողանա լուծել եւ պատասխաններ տալ:

5. Այս այրերը այդպես վարվեցին, որ մեզ վրա վաճառեն իրենց գրքերը, որոնք բանասերի կարդալու եւ ուսումնասիրելու համար են:

6. Այս այրերը այդպես վարվեցին, որ իրենց տներում, բազմոցի վրա փռված, մեր իսկ աշակերտներին պատրաստեն ավարտական եւ միասնական քննություններ հանձնելուն՝ ձեռքի հետ էլ հայոց լեզվի եւ գրականության ուսուցչին անգրագետ եւ այլ պիտակներ կպցնելով: Եվ կարճ հիշողություն ունենալու պատճառով մոռացան, որ դպրոց մտնող ուսուցչին հենց իրենք են ուսուցանել եւ կրթել:

Սիրելի՛ ուսուցիչներ, մեր՝ ուսուցիչներիս ձայնը միշտ խեղդվել է այս փքուն այրերի անիմաստ գոռգոռոցներից: Այս անգամ մենք պիտի միասին թույլ չտանք աշակերտ չտեսնող, 21-րդ դարի կրթության պահանջները չհասկացող մարդկանց մեր վզին փաթաթելու իրենց գրքերը, շտեմարանները…

Իսկ հանձնախումբը լարված աշխատում է՝ քննարկելով ՈՒՍՈՒՑՉԻ հետ, հաշվի առնելով ՆՐԱ կարծիքները եւ առաջարկները:

Սիրելի՛ ուսուցիչներ, լինե՛նք միասին եւ միակամ, օգնենք իրար՝ հանրակրթությունը /չմոռանանք՝ արմատը հանուր-ն է / ավելորդ ակադեմիզմից եւ գիտնական այրերի անիմաստ հոխորտանքից փրկելու համար»,- գրել է նա: