Դիմակը մի վայրկյան քթիցս ներքև չի եղել, բայց թե ոնց եմ վարակվել, չեմ կարող ասել. «Արմավիր» ԲԿ-ի տնօրեն

«Արմավիր» բժշկական կենտրոնի տնօրենի պաշտոնակատար Հարություն Զուռնաչյանը կորոնավիրուսով է վարակվել։ NEWS.am-ի հետ զրույցում պարոն Զուռնաչյանն ասաց, որ հիվանդությունը թեթև ընթացք է ունեցել։

«Մկանացավ, թուլություն ունեի։ Մեկ օր համի կորուստ եմ ունեցել, գլխացավեր ունեի, ջերմություն չեմ ունեցել, հիմա գանգատներ չունեմ, լավ եմ»,- ասաց նա։

Թե որտեղից կարող էր վարակվել, Հարություն Զուռնաչյանը չգիտի։ Ասում է, որ միշտ հետևել է անվտանգության կանոններին։

«Դիմակը մի վայրկյան քթիցս ներքև չի եղել, բայց թե ոնց եմ վարակվել չեմ կարող ասել»,- շեշտեց նա։

Մեր հարցին, թե բժշկական կենտրոնում վարակվածներ եղե՞լ են, տնօրենի պաշտոնակատարն արձագանքեց.

«Հիմա ահագին թեթևացել է, հունիսի մեկից սկսած մեծ պիկեր եղաn, այդ ժամանակ թոքաբորբով հիվանդների մեծ հոսք կար, և մենք այդ ընթացքում ծանր հոսպիտալիզացիայի ցուցումներ ունեցող հիվանդներին ընդունում էինք, մինչև որ կարողանում էինք տրիաժի հետ ճշտել, թե որտեղ կարող ենք իրենց կասկածելի դեպքերն ընդունել, մինչև նմուշի պատասխանի գալը հիվանդները սպասարկվել են, դրանից հետո, եթե նմուշառումը հաստատված է եղել, նոր կարողացել ենք տեղեր գտնել կորոնավիրուսային հիվանդությամբ զբաղվող կենտրոններում։ Այդ ընթացքում մենք մեկուսացված պալատներ էինք առանձնացրել, այդ հոսքին կարողացանք դիմադրել։ Դե բուժանձնակազմից էլ պարբերաբար վարակներ ունեցել ենք, թվերը չեմ կարող ասել, բայց վարակվածներ ունեցել ենք։ Նրանք մեկուսացվել են, հակահամաճարակային բոլոր միջոցառումները արվել են»,- հավելեց նա։