The Financial Times. Ադրբեջանի եւ Հայաստանի միջեւ մարտական գործողությունները թեժանում են

Կովկասի լեռներում աշխարհի ամենահին տարածքային վեճերից մեկը վերսկսվել է այն բանից հետո, երբ անցած շաբաթ Հայաստանի եւ Ադրբեջանի սահմանին մարտերի հետեւանքով զոհվեց 20 մարդ:

Այս մասին հեղինակ Մաքս Սեդդոնը գրում է The Financial Times-ում հրապարակված իր հոդվածում: «Անսպասելի էսկալացիան տեղի ունեցավ այն ժամանակ, երբ երկու երկրներն էլ փորձում են զսպել կորոնավիրուսի համավարակը։ Հայաստանում, որի բնակչությունը ընդամենը 3 միլիոն է, գրանցվել է Covid-19-ի մոտ 35 000 դեպք։ Միաժամանակ, էներգետիկ ռեսուրսներով հարուստ Ադրբեջանի տնտեսությունը տուժել է նավթի գների անկումից»,- նշում է հեղինակը:

«Բանակցությունները որեւէ արդյունք չեն տալիս, ինչը մեծացնում է լարվածությունը միջազգային սահմանային տարածքներում, այդ պատճառով յուրաքանչյուր կողմ սպասում է, որ մյուսը կհարձակվի»,- ասում է ադրբեջանցի վերլուծաբան Զաուր Շիրիեւը: Երեւանում Տարածաշրջանային հետազոտությունների կենտրոնի տնօրեն Ռիչարդ Կիրակոսյանի խոսքերով՝ «իրական հարցը ոչ այնքան միջազգային միջնորդությունն է, որքան այն, որ Հայաստանը եւ Ադրբեջանը ցանկանում են շարունակել այս էսկալացիան: Ներկայում Հայաստանը ստիպված է արձագանքել, եւ մենք գտնվում ենք դժվար իրավիճակում, որը դուրս է գալիս վերահսկողությունից»:

Ինչպես նշում է հեղինակը, «հաշտության հույսը հայտնվեց 2018 թվականին՝ այն բանից հետո, երբ Հայաստանը «թավշյա հեղափոխության» արդյունքում տապալեց նախագահ Սերժ Սարգսյանին՝ «ղարաբաղյան կլանի» ղեկավարին: «Հայաստանն ու Ադրբեջանը գործարկեցին հաղորդակցման ուղիղ խողովակներ՝ առաջնագծում կրակոցների դեպքերը նվազագույնի հասցնելու համար, եւ անցյալ տարվա սկզբին հայտարարեցին, որ իրենք «բնակչությանը կպատրաստեն խաղաղության համար»,- հավելում է Սեդդոնը: Հեղինակի խոսքերով՝ «Ադրբեջանի հույսերը, թե նախկին լրագրող պարոն Փաշինյանը, որը ոչ մի կապ չունի Լեռնային Ղարաբաղի հետ, կարող է էականորեն կրճատել հակամարտության մեջ երկրների դիրքորոշումների միջեւ պառակտումը, պարզվեց՝ անտեղի էին: Վարչապետ դառնալուց մեկ օր հետո պարոն Փաշինյանը այցելեց Լեռնային Ղարաբաղ եւ այդ օրվանից մի քանի անգամ վերադարձել է, այդ թվում՝ մայիսին նոր նախագահի երդմնակալությանը մասնակցելու»:

«Այս բոլոր քայլերը ենթադրում են, որ Հայաստանի քաղաքականության մեջ որեւէ փոփոխություն չի լինի, ինչը Ադրբեջանում ընկալվում է որպես անեքսիայի շարունակական քաղաքականություն»,- ասում է «Հաշտեցման ռեսուրսներ» կովկասյան ծրագրի տնօրեն Լոուրենս Բրոերսը: «Որքան երկար է տեւում հակամարտությունը, այնքան քիչ հավանական է, որ Ադրբեջանը կստանա նվազագույն զիջումներ կամ արդյունքներ, էլ չենք խոսում Լեռնային Ղարաբաղը վերադարձնելու մասին»,- ավելացնում է նա: Հեղինակի խոսքերով՝ «պարոն Փաշինյանի հռետորաբանությունը ավելի քիչ ռազմատենչ է, քան նրա նախորդինը:

«Նրա կինը՝ լրագրող Աննա Հակոբյանը, քարոզարշավ է սկսել սոցիալական ցանցերում, որպեսզի դադարեցվեն ռազմական գործողությունները: Սակայն հասարակական լարվածությունը Ադրբեջանում բարձր է մնում՝ այս շաբաթ տեղի ունեցած բախումներից հետո, որի հետեւանքով մահացավ Ադրբեջանի գեներալ-մայոր Փոլադ Հաշիմովը», - նշում է հեղինակը: Հոդվածի հեղինակը հավելել է, որ Ադրբեջանի նախագահ Իլհամ Ալիեւը պաշտոնից հեռացրել է իր արտգործնախարարին, որը, նրա խոսքերով, «մասնակցել է ինչ-որ անիմաստ բանակցությունների»՝ փորձելով հասանելիություն տրամադրել Առողջապահության համաշխարհային կազմակերպության պաշտոնատար անձանց՝ Ղարաբաղում համավարակի դեմ պայքարին օգնելու համար: «COVID- ի հետ կապված ի՞նչ բանակցություններ կարելի է վարել թշնամական երկրի հետ, այն երկրի հետ, որը հակամարտության մեջ է մեզ հետ: Սա աբսուրդ է: Այսինքն՝ դա նշանակում է, որ մենք սկսում ենք համագործակցե՞լ Հայաստանի հետ»,- նշում է Ալիեւը։