Հակառակորդին հաջողվել է SMS-ների միջոցով ապատեղեկատվություն տարածել․ Ucom-ն ու Viva-MTS-ը հայտարարություն են տարածել

Հայկական բջջային օպերատորները՝ Ucom-ն ու Viva-MTS-ը հայտարարել են, որ հակառակորդին հաջողվել է կարճ հաղորդագրությունների միջոցով ապատեղեկատվություն տարածել իրենց առանձին բաժանորդների շրջանում:

Այս առնչությամբ Viva-MTS-ի տարածած հաղորդագրության մեջ ասվում է. «Վաղ առավոտյան ներթափանցելով կապի շարժական օպերատորների հետ գործակցող փոքր VAS (ավելացված արժեքով ծառայություններ մատուցող) օպերատորներից մեկի համակարգը, հակառակորդին հաջողվել է կարճ հաղորդագրությունների միջոցով ապատեղեկատվություն տարածել առանձին բաժանորդների շրջանում:

Մենք մշտական կապի մեջ ենք VAS օպերատորի հետ, որի մասնագետներն աշխատում են իրենց համակարգի անվտանգությունն ուժեղացնելու ուղղությամբ: Ըստ VAS օպերատորի, ապատեղեկատվություն ստացած բոլոր բաժանորդներն արդեն ստացել են իրենց կողմից ուղարկված հերքումը»,-նշված է հաղորդագրությունում։

Նմանատիպ հաղորդագրություն է տարածել նաեւ Ucom-ը:

Ավելի վաղ Հայաստանի ՊՆ-ն հանդես էր եկել հայտարարությամբ, որտեղ նշում էր, որ վաղ առավոտից հակառակորդը հերթական ապատեղեկատվությունն է տարածում: Հաղորդագրությունը, թե իրավիճակը սահմանին լարված է և հայկական կողմը կորուստներ ունի, իրականությանը չի համապատասխանում: Այդ հաղորդագրության հետ պաշտպանության նախարարությունը, որևէ կապ չունի, դա հակառակորդի հերթական, կեղծ,ապատեղեկատվությունն է: Եղե՛ք ուշադիր, մի՛ տրվեք հակառակորդի սադրանքներին: