Իլհամ Ալիեւը հայտնվել է փակուղում. Վաղարշակ Հարությունյան

Ադրբեջանում հիմնական բյուջեն՝ մոտ 90 տոկոսը, ձեւավորվում է նավթադոլարներից, եւ երբ որ գները անկում են ապրել, Ադրբեջանի բյուջեն լրջագույն պրոբլեմների առաջ է կանգնել, ինչի հետեւանքով կա լուրջ սոցիալական դժգոհություն: Այս մասին այսօր՝ հուլիսի 16-ին լրագրողների հետ զրույցում ասաց պաշտպանության նախկին նախարար Վաղարշակ Հարությունյանը՝ անդրադառնալով Ադրբեջանի ներքաղաքական իրավիճակին:

«Մյուս կողմից էլ երկրի ներքին կյանքը ղեկավարվում է կլաններով, որտեղ ներիշխանական պայքար է գնում եւ ձգտում են ունենալ ավելի մեծ ազդեցություն»,-ասաց նա:

Նախկին նախարարի խոսքով, ստեղծված պայմաններում Ադրբեջանը փորձում է մեղմել իրավիճակը սահմանային լարումների գնով:

Իսկ ինչ վերաբերվում է հակահայկական տրամադրություններին, նախկին նախարարը նշեց, որ դա գալիս է Թուրքիայի վարած քաղաքականությունից, այստեղ Թուրքիան «արջի ծառայություն» է մատուցում Ադրբեջանին, հրահրում է պատերազմ եւ դրա միջոցով ուզում է առաջ մղել իր նեոօսմանիզմի գաղափարն ու խնդիրները:

«Այստեղ մենք շատ զգոն պետք է ընդունենք Թուրքիայի պաշտպանության նախարարի հայտարարությունը, որ նրանք պատրաստ են ռազմական աջակցություն ցոցաբերել Ադրբեջանին. սա ավում է, որպեսզի Թուրքիան շահած դուրս գա, ինչը որ եղավ 2016 թվականի ապրիլին: Այն ժամանակ էլ նույն հայտարարություններն էին անում: Եթե Ադրբեջանը սկսի պատերազմ, Թուրքիան խոստանում է աջակցել, սակայն նա չի անի դա»,- ասաց նախկին նախարարը:

Հարցին, թե արդյոք Իլհամ Ալիեւը հայտնվել է փակուղում, քանի որ ռազմական առումով պարտություն է կրում, ներսում էլ ճնշումներ են, բանախոսն ասաց, որ, այո, նա փակուղում է հայտնվել, քանի որ 2012-2013 թվականից մինչ ասյօր Ադրբեջանը 20 մլրդ-ից ավել գումար է ծախսել բանակի վրա, իրենց հասարակությանն էլ ներկայացրել է, որ եթե պետությունը վատ վիճակում է, ապա առաջնային պետք է լուծեն Ղարաբաղի հարցը, հետեւաբար գումարը պետք է դնեն բանակաշինության վրա:

«Գալիս է ժամանակ, երբ բանակն ի վիճակի չէ լուծել որեւէ խնդիր, մյուս կողմից էլ ներքաղաքական պայքարը, որը բերելու է մի վիճակի, որն այսօր ունենք, իրենք չեն ուզում գնալ բանակցային ճանապարհով, մյուսն էլ ռազմական ճանապարհն է, որը չի ընդունում որեւէ միջազգային կառույց եւ պետություն: Իմ կարծիքով սա Ադրբեջանում բերելու է լուրջ փոփոխությունների»,- հավելեց Վաղարշակ Հարությունյանը: