ՄԻԵԴ-ը ՍԴ 3 դատավորի և ՍԴ նախագահ Հրայր Թովմասյանի իրավունքի խախտման մասով դիմումները վարույթ է ընդունել

Մարդու իրավունքներ եվրոպական դատարանն այսօր որոշում է կայացրել ՍԴ 3 դատավորի և ՍԴ նախագահ Հրայր Թովմասյանի ներկայացրած դիմումների («Գյուլումյանն ու մյուսներն՝ ընդդեմ Հայաստանի) հարցով՝ կապված ՀՀ սահմանադրական վերջին փոփոխությունների և իրենց իրավունքների հնարավոր խախտման հետ:

Նշվում է, որ 4 դիմումատուները՝ Ալվինա Գյուլումյանը, Հրանտ Նազարյանը, Ֆելիքս Թոխյանը և Հրայր Թովմասյանը, ի թիվս այլ հարցերի՝ իրենց դիմումներում միջնորդել էին, որ Եվրոպական դատարանը միջանկյալ միջոց կիրառի և հրահանգի ՀՀ կառավարությանը կասեցնել սահմանադրական փոփոխությունները մինչև իրենց իրավունքների խախտման վերաբերյալ դիմումների քննության ավարտը և մինչ այդ ժամկետը պահպանել նրանց պաշտոնները:

Դատարանը որոշում է կայացրել մերժել միայն միջանկյալ միջոց կիրառելու միջնորդությունը՝ նշելով, որ այն դուրս է Դատարանի կանոնակարգի 39-րդ կանոնի (միջանկյալ միջոց) կիրառման շրջանակից, քանի որ այն հիմնական օրենքին լուրջ և անդառնալի վնաս հասցնելու վտանգ չի պարունակում՝ համաձայն Մարդու իրավունքների եվրոպական կոնվենցիայի:

Իրավունքների խախտման մասով դիմումները վարույթ են ընդունվել։

Հայցատուները ներկայացրած բողոքում շեշտել էին, որ իրենց պաշտոնավարմանը խոչընդոտող սահմանադրական փոփոխությունների ընդունումը տեղի է ունեցել ազգային օրենքի խախտմամբ և կամայական բնույթ է կրել:

Հիշեցնենք, որ սահամանդրական փոփոխություններով դադարեցվում է ՍԴ բոլոր դատավորների լիազորությունները, որոնց պաշտոնավարման 12 տարին լրացել է,իսկ Հրայր Թովմասյանը դառնում է ՍԴ դատավոր։Փոփոխությունների փաթեթն ամբողջությամբ ուժի մեջ կմտնի,եթե այն ընդունելուց 21 օր անց նախագահը չստորագրի և չուղարկի ՍԴ և այն ստորագրի ԱԺ նախագահ Արարատ Միրզոյանը։