Ո՞ւր է ուղղվել արտակարգ դրության ռեժիմը խախտած քաղաքացիների վճարած 3.7 միլիոն դրամը

168.am-ը ոստիկանությանը գրավոր հարցում է ուղարկել՝ պարզելու համար, թե հուլիսի 2-ի դրությամբ քանի՞ քաղաքացի է տուգանվել և որքա՞ն գումար է վճարվել՝ որպես տուգանք:

Ոստիկանությունից այսօր ստացել ենք գրավոր պատասխանը, որում ասված է. «Մինչև հուլիսի 2-ը Հայաստանի Հանրապետությունում արտակարգ իրավիճակի հիմքով հայտարարված արտակարգ դրության ընթացքում հանրային բաց տարածքներում դիմակի պարտադիր առկայության պահանջը չպահպանելու կամ կանգառում դիմակ չկրելու, այնուհետև 03․06․2020թ.-ից հանրային բաց տարածքում դիմակ չկրելու, իսկ 16․06․2020թ.-ից նաև անձնագրի պարտադիր առկայությունը չպահպանելու համար կազմվել են 49․591 վարչական արձանագրություններ, որոնցից 14․600-ով արդեն իսկ կայացվել են վարչական տուգանք նշանակելու մասին որոշումներ։ Նշված որոշումներից 81-ը բողոքարկվել են, իսկ 207-ով կատարվել է 2․070․000 ՀՀ դրամ գանձում։

Ընդհանուր առմամբ արտակարգ դրության իրավական ռեժիմի կանոնները խախտելու համար նշանակված տուգանքներից վճարվել է 3․760․000 ՀՀ դրամ»։

Հետաքրքրվել էինք նաև, թե արդյոք կա՞ն դեպքեր, երբ նույն անձը մի քանի անգամ է տուգանվել, ինչպես նաև, թե ո՞ւր են ուղղվել այդ գումարները, ինչին ոստիկանությունից պատասխանել են, որ այդ տեղեկատվությունը հնարավոր չէ տրամադրել:

«Հարցմամբ ներկայացված մյուս հարցերի վերաբերյալ տեղեկատվություն հնարավոր չէ տրամադրել, քանի որ ՀՀ ոստիկանության հասարակական անվտանգության ապահովման գլխավոր վարչությունում նման հաշվառումներ չեն իրականացվում»։