Որքա՞ն աշխատավարձ են ստացել նախարարները 2019 թ-ին, ի՞նչ ունեցվածք ունեն․ 12 նախարարների հայտարարագրերը

Tert.am-ը ուսումնասիրել է ՀՀ 12 նախարարների 2019 թ-ի տարեկան հայտարարագրերը, որոնք հրապարակված են Կոռուպցիայի կանխարգելման հանձնաժողովի կայքում։ Ստորև առանձին-առանձին ներկայացված է, թե նախարարները նախորդ տարի որքան աշխատավարձ են ստացել, ինչ գործարքներ են կատարել, քանի անշարժ և շարժական գույք են հայտարարագրել և այլն։

Աշխատանքի և սոցիալական հարցերի նախարար Զարուհի Բաթոյան

Զարուհի Բաթոյանը, 2019թ. տարեկան հայտարարագրի համաձայն, շարժական և անշարժ գույք ձեռք չի բերել և օտարել: Հայտարարատու պաշտոնատար անձը՝ որպես դրամական միջոց, նշել է 8․5 մլն դրամ, 335 եվրո, 500 դոլար:

Զարուհի Բաթոյանը քաղաքացիական պայմանագրերից եկամուտ է ստացել 320 հզր դրամ, որպես նվիրատվություն կամ օգնություն ստացել է 783 հզր դրամ, ինչպես նաև 470 հզր դրամ, բացի այդ՝ որպես աշխատանքի վարձատրություն նշել է 20 մլն 122 հզր դրամ:

«Պետական պաշտոններ զբաղեցնող անձանց վարձատրության մասին» ՀՀ օրենքի համաձայն՝ նախարարների աշխատավարձի հաշվարկման գործակիցը 12 է, հետևաբար, Զարուհի Բաթոյանի ամսեկան աշխատավարձը կազմում է 793 հզր 680 դրամ: Ստացվում է, որ Բաթոյանի տարեկան աշխատավարձը կազմում է 9 մլն 524 հզր, իսկ մնացածը՝ 10 մլն 597 հզր դրամը նախարարի պարգևատրումներն են:

Նախարար նշանակվելու պահին՝ 2019թ. հունվարին, երբ Բաթոյանը ներկայացրել է հայտարարագիր, նշել է 335 եվրո և 500 հզր դրամ, ինչպես նաև մեկ բնակարան: Այժմ դրամական միջոցները կազմում են ավելի քան 21 մլն դրամ, պարգևատրումը՝ 10.6 մլն դրամ։

Արդարադատության նախարար Ռուստամ Բադասյան

Ռուստամ Բադասյանը 2019 հունիսի 19-ին արդարադատության նախարար նշանակվելուց հետո մինչև նախորդ տարեվերջ ստացել է 8 մլն 779 հազար դրամ աշխատավարձ և դրան հավասարեցված այլ վճարներ։ Մինչ նախարար դառնալը, Ռուստամ Բադասյանը զբաղեցրել է Պետական եկամուտների կոմիտեի նախագահի առաջին տեղակալի պաշտոնը և ՊԵԿ-ում աշխատանքի դիմաց 2019 թվականին ստացել է 8 մլն 622 հազար դրամ աշխատավարձ, ևս 2 մլն 57 հազար դրամ այլ եկամուտներ՝ կրկին ՊԵԿ-ից։ Ընդհանուր, Ռուստամ Բադասյանը 2019 թ-ին 19․5 մլն դրամ աշխատավարձ է ստացել ԱՆ-ից և ՊԵԿ-ից։

Արդարադատության նախարարն անշարժ գույք չունի։ Նա հայտարարագրել է մեկ տրանսպորտային միջոց՝ 1996 թվականի արտադրության MERCEDES-BENZ մարդատար ավտոմեքենա, որը գնել է 2014 թվականին։

Ռուստամ Բադասյանը «Էկոշին Գրուպ» ՍՊԸ-ին 45 մլն 584 հազար դրամի փոխառություն (վարկ) է հանձնել, իսկ 41 մլն դրամ փոխառություն ստացել է «Ամերիա» բանկից։

Տարեսկզբին Ռուստամ Բադասյանի բանկային հաշվին առկա է եղել 6 մլն 755 հազար դրամ, 371 եվրո, տարեվերջին՝ 3 մլն 279 հազար դրամ, 582 եվրո։ Կանխիկ դրամական միջոցները տարեսկզբին կազմել է 849 եվրո, տարեվերջին՝ 340 դոլար։

Առողջապահության նախարար Արսեն Թորոսյան

Արսեն Թորոսյանը Երևանի Նոր Նորք զանգվածում հայտարարագրել է մեկ անհատական բնակելի տուն։ Նա իր անվամբ տրանսպորտային միջոց չունի։

Տարվա սկզբին նախարարը ունեցել է 20 հազար 331 դոլար ավանդ, իսկ տարվա վերջին՝ 32 հազար դոլար ավանդ։ Տարվա սկզբին իր բանկային հաշվին Թորոսյանը ունեցել է 1 մլն 925 հազար 798 դրամ, 119 դոլար և 22 հազար եվրո, իսկ տարվա վերջին՝ 114 հազար 897 դրամ, 15 դոլար և 31 հազար եվրո։

Որպես աշխատանքի վարձատրություն՝ Արսեն Թորոսյանը նշել է 18 մլն 183 հազար 150 դրամ։

Արտակարգ իրավիճակների նախարար Ֆելիքս Ցոլակյան

ԱԻ նախարարը անշարժ և շարժական գույք չունի և ձեռք չի բերել 2019-ին։ Տարեսկզբին հայտարարագրել է 13 մլն կանխիկ դրամ, տարեվերջին՝ 20 մլն դրամ։

Նախարարությունից նախորդ տարի ստացել է 16 մլն 453 հազար դրամ աշխատավարձ և դրան հավասարեցված այլ վճարներ։ Եվս 3 մլն 85 հազար դրամ կենսաթոշակ է ստացել Ազգային անվտանգության ծառայությունից։

Ֆելիքս Ցոլակյանը 1993 թ-ից աշխատել է ԱԱԾ-ում, 2007 - 2013 զբաղեցրել է Ազգային անվտանգության ծառայության տնօրենի տեղակալ պաշտոնը։

Արտաքին գործերի նախարար Զոհրաբ Մնացականյան

Զոհրաբ Մնացականյանը ունի բնակարան Երևանի Արաբկիր վարչական շրջանում և 2002 թ-ի արտադրության VOLKSWAGEN մարդատար մեքենա։

ԱԳ նախարարի բանկային հաշվին տարվա սկզբին եղել է 19 հազար դոլար, 3 մլն 265 հազար դրամ, տարեվերջին՝ 18 հազար դոլար, 11 մլն 560 հազար դրամ։

Նախորդ տարի Զոհրաբ Մնացականյանը ԱԳՆ-ից ստացել է 16 մլն 776 հազար դրամ աշխատավարձ և հավասարեցված այլ վճարներ։

Շրջակա միջավայրի նախկին նախարար Էրիկ Գրիգորյան

Էրիկ Գրիգորյանը թեև 2020 թ-ի մայիսի 5-ին հրաժարական է ներկայացրել, սակայն նրա հայտարարագիրը Tert.am-ը ներկայացնում է, քանի որ ամբողջ 2019 թ-ի ընթացքում նա զբաղեցրել է ՇՄ նախարարի պաշտոնը։

Շրջակա միջավայրի նախկին նախարարը ունի բնակարան և ավտոկայանատեղի Ավան վարչական շրջանում, որոնք ձեռք է բերել 2018 թ-ի նոյեմբերին։ Տարեսկզբին Էրիկ Գրիգորյանը 2 տրանսպորտային միջոց է ունեցել՝ 1997 թ-ի OPEL և 2015 թ-ի արտադրության TOYOTA։ 2019 թ-ի մարտին նա 5 մլն դրամով վաճառել է TOYOTA մակնիշի մեքենան։

Էրիկ Գրիգորյանը նախորդ տարի «Բայկ» ՍՊԸ-ին տարեսկզբին հանձնել է ավելի քան 38 հազար եվրո փոխառություն։ Ի դեպ, «Բայկ» ՍՊԸ-ի 100 տոկոս բաժնետերը հենց Էրիկ Գրիգորյանն է, սակայն նա նախարարի պաշտոնը զբաղեցնելու ժամանակ ընկերությունը հավատարմագրային կառավարման է հանձնել Նանե Շահնազարյանին։

Գրիգորյանի բանկային հաշվին տարեսզկբին առկա էր՝ 7․4 մլն դրամ, 896 շվեյցարական ֆրանկ, տարեվերջին՝ 13․8 մլն դրամ, 3000 եվրո, 896 շվեյցարական ֆրանկ։ Նա նաև հայտարարագրել է 3 մլն կանխիկ դրամ։

Շրջակա միջավայրի նախարարությունից նախորդ տարի ստացել է 18 մլն 428 հազար դրամ աշխատավարձ և դրան հավասարեցված այլ վճարներ։ Եվս 1․8 մլն դրամ այլ եկամուտներ է ստացել ֆինանսների նախարարությունից և 23 հազար դոլար «Ամերիա» բանկից։

Էկոնոմիկայի նախարար Տիգրան Խաչատրյան

Տիգրան Խաչատրյանը հայտարարագրել է 6 անշարժ գույք՝ 1 բնակարան Երևանի Կենտրոն վարչական շրջանում, 2 հողամաս՝ Դիլիջանում և Ջրվեժում, 1 անշարժ գույք Ջրվեժում, 1 ավտոտնակ, 1 այգետնակ։

Նախարարը տարվա սկզբին ունեցել է 5500 եվրո և 15 հազար դոլար ավանդ, տարեվերջին՝ 1000 եվրո, 15 հազար դոլար ավանդ։ Տրված փոխառությունների դիմաց տոկոսից ստացել է 818 հազար դրամ եկամուտ։ Տիգրան Խաչատրյանը 2019 թ-ին նաև գնել է 27 հազար դոլարի պարտատոմսեր։

Նրա բանկային հաշվին առկա է 302 դոլար և 1․2 մլն դրամ, իսկ կանխիկ՝ 23 հազար դոլար։ Աշխատանքի դիմաց Էկոնոմիկայի նախարարությունից ստացել է 16 մլն 778 հազար դրամ եկամուտ։

Կրթության, գիտության, մշակույթի և սպորտի նախարար Արայիկ Հարությունյան

Արայիկ Հարությունը անշարժ գույք և տրանսպորտ չունի։ Բանկային հաշվին տարեսկզբին ունեցել է 1․2 մլն դրամ, տարեվերջին՝ 4․2 մլն դրամ։ Եվս 1․2 մլն դրամ կանխիկ դրամ է հայտարարագրել։

Արայիկ Հարությունյանը ԿԳՄՍ նախարարությունից 2019 թ-ին ստացել է 16 մլն 876 հազար դրամ աշխատավարձ և դրան հավասարեցված այլ վճարներ։ 142 հազար դրամ եկամուտ էլ ստացել է Երևանի պետական համալսարանից։

Պաշտպանության նախարար Դավիթ Տոնոյան

Դավիթ Տոնոյանը մինչև նախորդ տարեսկիզբ անշարժ գույք չի ունեցել, իսկ 2019 թ-ի հունվարին Նոր Նորքում բնակարան է նվիրատվություն ստացել։ Նախարարը նաև 2003 թ-ի TOYOTA մարդատար մեքենա է հայտարարագրել։

Նրա բանկային հաշվին տարեսկզբին եղել է 577 հազար դրամ, տարեվերջին՝ 8․5 մլն դրամ։ Կանխիկ դրամական միջոցները տարեսկզբին կազմել է 2․8 մլն, տարեվերջին՝ 3․5 մլն դրամ։

Պաշտպանության նախարարը 2019 թ-ին 12 մլն 791 հազար դրամ աշխատավարձ է ստացել, ևս 7․1 մլն դրամ Դավիթ Տոնոյանը նորից ՊՆ-ից այլ եկամուտներ է ունեցել, ինչպես նաև 1․9 մլն դրամ կենսաթոշակ։

Բարձր տեխնոլոգիական արդյունաբերության նախարար Հակոբ Արշակյան

ԲՏԱ նախարարը հայտարարագրել է 2 բնակարան Դավթաշեն վարչական շրջանում, որոնցից մեկը նվիրատվություն է ստացել 2019 թ-ին։ Հակոբ Արշակյանի հայտարարագրում նաև ներկայացված է 2001 թ-ի արտադրության MERCEDES-BENZ մարդատար մեքենա։

Նախարարի բանկային հաշվին տարեսկզբին եղել է 1․9 մլն դրամ, տարեվերջին՝ 3․2 մլն դրամ։ Կանխիկ դրամական միջոցները տարեսկզբին կազմել է 25 մլն դրամ, տարեվերջին 9․5 մլն դրամ։

Նախարարությունում աշխատանքի դիմաց Հակոբ Արշակյանը 2019 թ-ին ստացել է 16 մլն 775 հազար դրամ եկամուտ։

Ֆինանսների նախարար Ատոմ Ջանջուղազյան

Ատոմ Ջանջուղազյանն ունի 1 անշարժ գույք Աջափնյակում, 1 բնակարան Ծաղկաձորում, ինչպես նաև 2011 թ-ի արտադրության MITSUBISHI մարդատար մեքենա։

Ֆինանսների նախարարը տարեսկզբին հայտարարագրել է 8․4 մլն դրամ, 24 500 դոլար, 12 800 եվրո կանխիկ գումար, տարեվերջին՝ 10․3 մլն դրամ, 25 000 դոլար, 10 000 եվրո։

Ատոմ Ջանջուղազյանը նախորդ տարի 15 մլն 196 հազար դրամ եկամուտ է ստացել նախարարությունից, 2 մլն 260 հազար դրամ՝ «Կարբի ջրհոս» ՀԷԿ-ի 10 տոկոս շահաբաժնից։

Տարածքային կառավարման և ենթակառուցվածքների նախարար Սուրեն Պապիկյան

ՏԿԵ նախարարը հայտարարագրել է 3 հողամաս Լոռի բերդ համայնքում։ 2019 թ-ի փետրվարին նա ձեռք է բերել 26 մլն 762 հազար դրամ արժողությամբ բնակարան Արաբկիր վարչական շրջանում, որը բաժնային սեփականություն է։ Տարեսկզբին Սուրեն Պապիկյանն ունեցել է 2005 թ-ի արտադրության NISSAN մեքենա, որը 2․5 մլն դրամով վաճառել է 2019 թ-ի հունվարին։

Նա «ՄԻԿՇԻՆ» ընկերությանը փոխառություն է հանձնել տարվա սկզբին՝ 12․4 մլն, տարվերջին՝ 26․7 մլն դրամ։ Նախարարի բանկային հաշվին տարեսկզբին եղել է 5․3 մլն դրամ, տարեվերջին՝ 13․1 մլն դրամ։ Նա ևս 2․3 մլն դրամ և 2000 դոլար կանխիկ գումար է հայտարարագրել։

Նախորդ տարի նախարարությունից Սուրեն Պապիկյանը ստացել է 17 մլն 964 հազար դրամ աշխատավարձ և դրան հավասարեցված այլ վճարներ։ 1 մլն 131 հազար դրամ այլ եկամուտներ է ունեցել ֆինանսների նախարարությունից, 40 հազար դրամ էլ՝ ԵՊՀ-ից։

Սուրեն Պապիկյանը 2019 թ-ին նաև 3 փոխառություն (վարկ) է վերցրել․ 18 մլն 733 հազար դրամ «Արդշինբանկից», 1․5 մլն դրամ և 350 հազար դրամ էլ «ՎՏԲ-Հայաստան» բանկից։