Նախարարը չի թաքցնում՝ նպատակը բժշկականի հոգաբարձուների խորհրդի կազմը փոխելն է

Բժշկական համալսարանի հոգաբարձուների խորհուրդն արդեն մոտ երեք ամիս է՝ չի ձեւավորվում։ Ապրիլի վերջին դադարել է գործել հին խորհուրդը, որի նախագահն էր երգահան Վահան Արծրունին, ու մինչ օրս ո՛չ նոր խորհրդի կազմն է հայտնի, ո՛չ էլ դրա ձեւավորման ժամկետները։ Նշենք, որ խորհուրդը բաղկացած է 32 անդամից, որից ութը ԵՊԲՀ գիտխորհրդից է ընտրվում, ութը՝ ուսանողներից, ութին հիմնադիրը, այսինքն՝ կառավարությունն է առաջադրում, որոնք կարող են լինել պետական պաշտոնյաներ, իսկ մյուս ութին՝ լիազոր մարմինը, այսինքն՝ կրթության, գիտության, մշակույթի եւ սպորտի նախարարությունը։

Բժշկական համալսարանի աշխատակազմից hraparak.am-ին ասացին, որ իրենց թեկնածուների ցանկն արդեն ներկայացրել են, իսկ կառավարության մասով դեռ որեւէ տեղեկություն չկա։ ԿԳՄՍ նախարարությունից էլ հայտնեցին, որ իրենց ցանկը դեռ չեն ներկայացրել, առաջիկա օրերին կներկայացնեն ու չեն կարող ասել՝ Վահան Արծրունին կլինի՞ այդ ցանկում, թե՞ ոչ։ Ինչ վերաբերում է բուհերում, այդ թվում՝ Բժշկական համալսարանում, հոգաբարձուների խորհուրդների ձեւավորման ձգձգմանը, ԿԳՄՍ նախարարությունից պատճառաբանում են, թե դա կորոնավիրուսով է պայմանավորված։ Սա, իհարկե, մեղմ ասած, տարօրինակ արդարացում է, քանզի կորոնավիրուսի պայմաններում երկրում Ազգային ժողովի ու կառավարության նիստեր են անցկացվում, արտահերթ նիստով սահմանադրական փոփոխություն է արվում, իսկ բուհերում հոգաբարձուների խորհուրդ, չգիտես ինչու, ոչ մի կերպ չեն կարողանում ձեւավորել։ Մինչդեռ խոսքն ընդամենը թղթի վրա ցուցակ կազմելու եւ կառավարություն ներկայացնելու մասին է, որն էլ իր հերթին իր թեկնածուներին պետք է գրեր եւ կառավարության որոշմամբ որեւէ նիստում հաստատեր։

Բժշկական համալսարանի՝ արդեն իր լիազորություններն ավարտած հոգաբարձուների խորհրդի նախագահ Վահան Արծրունին ասաց, որ տեղյակ չէ, թե ինչու չի ձեւավորվում խորհուրդը, նաեւ գաղափար չունի՝ արդյոք կառավարությունը կրկին ներկայացրե՞լ է իր թեկնածությունը, թե՞ ոչ։

- Իսկ եթե ներկայացնի, կհամաձայնե՞ք նորից ընդգրկվել հոգաբարձուների խորհրդի կազմում, նաեւ՝ ընտրվել խորհրդի նախագահ։

- Բնականաբար, իհարկե, իսկ ինչո՞ւ չպիտի լինեմ։ Եթե ես՝ ինքս, հրաժարվեի այդ պաշտոնից կամ դուրս գայի խորհրդի կազմից, ինչպես մի քանիսն արեցին անցած տարվա ընթացքում, գուցե տրամաբանական լիներ Ձեր հարցը, բայց ես նման բաներ չեմ ձեռնարկել եւ չէի էլ պատրաստվում այդ ուղղությամբ որեւէ բան ձեռնարկել։

- Ինչ-որ ճնշումներ այս ընթացքում եղե՞լ են խորհրդի կազմի, այդ թվում՝ Ձեզ վրա։

- Ոչ, բացարձակապես ոչ մի ճնշում։ Եղել են սադրանքներ հիմնականում մասսմեդիայում, բայց դրանք բուն խորհրդի աշխատանքի եւ խորհրդի մեջ եղած բարձր ակադեմիական կուլտուրայի, հարաբերությունների վրա որեւէ ազդեցություն չեն ունեցել։

- Իսկ ինչպե՞ս են նախարարի հետ Ձեր հարաբերությունները։

- Ես չեմ ճանաչում այդ մարդուն․․․ Ո՞ր նախարարի։

- Ե՛վ կրթության նախարարի, ե՛ւ առողջապահության։

- Կրթության նախարարին վերջին անգամ անձնապես տեսել եմ, երբ որ նա բոլոր հոգաբարձուների խորհուրդների նախագահներին հանդիպման հրավիրեց Մատենադարանում, դրանից հետո անձնական շփում չի եղել, իսկ առողջապահության նախարարին ընդհանրապես չեմ ճանաչում եւ չեմ էլ ուզում ճանաչել։

- Հաշվի առնելով այդ հարաբերությունները, որոնք, մեղմ ասած՝ ջերմ չեն, Դուք էլ երբեմն հանդես եք գալիս քննադատությամբ կառավարության, առողջապահության նախարարության հասցեին, հնարավո՞ր է, որ կառավարությունն այլեւս չցանկանա Ձեզ տեսնել թե՛ խորհրդի կազմում, թե՛ առավել եւս՝ խորհրդի նախագահի պաշտոնում։

- Գիտե՞ք, երբ առաջին անգամ ինձ հրավիրեց Արայիկ Հարությունյանը՝ անդամակցելու խորհրդին, դեռեւս չկային խորհրդի նախագահի ընտրությունները, բնական է՝ ես հարցրեցի, թե ինչով է պատճառաբանված իմ ներկայությունն այդտեղ։ Բացատրությունը հետեւյալն էր, որ բացի կառավարության, պրոֆեսորադասախոսական եւ ուսանողական բաղադրիչից, նաեւ անհրաժեշտ են համարում հասարակական ներկայացուցչի առկայությունն այդ խորհրդում։ Եվ ես, փաստորեն, հասարակության միակ ներկայացուցիչն էի այդտեղ, որը եւ ընտրվեց որպես նախագահ՝ ընտրությունների ժամանակ։ Կարծեմ՝ 21-ը 7-ի էր բաժանվել։ Ուստի, եթե մտադրությունները եւ տեսանկյուններն այն ատյանի, որը պետք է ինձ առաջարկի երկրորդ անգամ, նույնն են մնացել, այսինքն՝ եթե նրանք չեն հրաժարվել իրենց գաղափարախոսությունից եւ սկզբունքներից այդ առումով, ապա, իհարկե, տրամաբանական է, որ ինձ կառաջարկեն՝ նորից անդամակցել այդ խորհրդին։ Եթե ինձ չառաջարկեն անդամակցել, դա կնշանակի, որ նրանք հետ են կանգնում այդ սկզբունքներից։ Համենայնդեպս, ես այդպես կընդունեմ։

- Նախարարությունից ասում են, որ խորհրդի ձեւավորման ձգձգման պատճառը կորոնավիրուսն է։ Ըստ Ձեզ՝ միայն կորոնավիրուսի պատճառով հնարավո՞ր է այս գործընթացի ձգձգումը։

- Դա ծիծաղելի պնդում է, որովհետեւ նույն կորոնավիրուսի օրոք ընդունվել է օրենք գույքահարկի մասին։ Այսինքն՝ այդ երկու պրոցեսներն իրարից կախված չեն, ստացվում է՝ մի պարագայում կորոնավիրուսը չի ազդում այդ վարչարարական ընթացքի վրա, իսկ երկրորդ պարագայում սկսում է ազդե՞լ։ Դա ծիծաղելի եւ զավեշտալի արդարացում է։

- Այդ դեպքում ո՞րն է պատճառը, որ առկախվել է այդ հարցը։

- Անկազմակերպվածությունը, ճշգրիտ եւ կանոնավոր կերպով աշխատանքները կազմակերպելու անունակությունը, որը շատ հատկանշական է այսօրվա կաբինետի անդամներին։

- Ձեզ մոտ կա՞ տպավորություն, որ կառավարությունը փորձում է բուհերի խորհուրդները ձեւավորել իր քիմքին ու ճաշակին համապատասխանող մարդկանցով, որպեսզի հետագայում իր համար կառավարելի լինեն այդ խորհուրդները։

- Եթե Դուք լսեք առողջապահության նախարարի 2019 թ․ սեպտեմբերի 3-ի «լայվը», նա այնտեղ բաց տեքստով ասում է, որ իրենց նպատակը եղել է՝ փոխել հատկապես Բժշկական համալսարանի հոգաբարձուների խորհրդի կազմը։ Այսինքն՝ Դուք պետք է հասկանաք, որ էստեղ խախտվում են գերատեսչական սահմանները, որովհետեւ Դուք շատ լավ գիտեք, որ Բժշկական համալսարանը ոչ թե առողջապահության, այլ կրթության նախարարության տիրույթում է։ Իսկ խորհուրդը փոխելու ցանկությունն առաջանում եւ արտահայտվում է լրիվ գերատեսչության ղեկավարի կողմից։ Մնացածը մեկնաբանեք ինքներդ։

hraparak.am