ժողովրդի աչքերի մեջ նայող եւ սուտ խոսող քաղաքական ուժը Հայաստանում անելիք չունի

Հպարտանալ ժողովրդավարության ոլորտում առաջընթացով հիշատակում անելով միջազգային ինչ-ինչ կազմակերպությունների զեկույցը, բայց արգելել բողոքի գործողությունները, որպես պատրվալ վկայակոչելով համավարակի առկայությունը, մեղմ ասած, լուրջ չէ: Հպարտանալ ժողովրդավարական առաջընթացով, բայց հակասահմանադրական ճանապարհով Սահմանադրական նախագահ փոխել, առնվազն անհեթեթություն է:

Ի՞նչ ժողովրդավարության մասին խոսք կարող է լինել, եթե ամենամեծ խմբակցության ղեկավարին խորհրդարանական մեծամասնությունը միաձայն քվեարկությամբ զրկում է անձեռնմխելիությունից: Ժողովրդավարություն, ժողովրդավարություն ասելով երկիրը ժողովրդավարական չի դառնում: Երկիրը ժողովրդավարական չի դառնում նաեւ վարչապետի ֆեյսբուքյան կեսգիշերային կամ վաղառավոտյան գրառումներով:

Ի՞նչ ժողովրդավարություն, երբ բողոքի ակցիա իրականացնող պատգամավորներին ոստիկանները, բառիս բուն իմաստով, քարշ են տալիս ասֆալտով կամ ոտնատակ են տալիս լրագրողներին:

Ավելի է լավ է ժողովրդավարությունից չխոսեք: Այդպես ավելի ճիշտ կլինի: Մի՞թե ժողովրդավարության վկլայությունն այն է, որ վարչապետը քաղաքական հակառակորդներին «քաղաքական դիակ» է համարում: Դե եթե «դիակ» են, ապա ինչու ես անդադար նրանց մասին խոսում:

Ինչ վերաբերում է վարչախմբի վերահսկողությունից դուրս գտնվող հեռուստաընկերություններին, ապա դա ոչ թե գործող, այլ նախկին իշխանությունների ձեռքբերումն է, որոնց կառավարման տարիներին մարդիկ ի վիճակի էին հեռուստաընկերություններ հիմնադրել: Ինչ վերաբերում է այժմ գործող կառավարող ուժին, ապա նրանք չեն էլ թաքցնում, որ երազում են այդ հեռուստաընկերությունները փակելու կամ կլանելու մասին:

Իսկ երբ վարչապետը ելույթ է ունենում եւ ակնհայտ սուտ տեղեկություն հայտնում, մարդկանց գցելով թյուրիմացության մեջ, իսկ հետո հարկ չի համարում ներողություն խնդրել, դա արդեն լուրջ խնդիր է պետության համար: Միանգամայն անտեղի, կոնտեքստից դուրս հիշատակել թերթերից մեկում 1999թ. հոկտեմբերի 27-ին հրապարակված լուսանկարը եւ գետնին գցված հագուստի լուսանկարը ներկայացնել որպես դիակի լուսանկար ու խորը գնացող հետեւություններ անել, արդեն չի տեղավորվում որեւէ տրամաբանության մեջ: Իսկ դուք խոսում եք ժողովրդավարությունից, ժողովրդավարության ոլորտում արձանագրված իբր առաջընթացից:

Մի՞թե ժողովրդավարության առաջընթացի վկայություններ են քաղաքական գործիչների, նրանց ընտանիքի անդամների, սանիկների, ընդդիմադիր պատգամավորների դեմ քրեական գործերի հարուցումը կամ հոգեբանական ճնշումները:

Եւ առեղծվածը ոչ թե այդ լուսանկարն էր, որն ընդամենը ընդգծում էր շարքային հարկատուի ծանր վիճակի մասին, այլ այսօր ՍԴ-ի դեմ իրականացվող հակաօրինական եւ հակասահմանադրական գործողությունները:

Ի՞նչ ժողովրդավարոսւթյան առաջընթացի մասին կարող է խոսք լինել, եթե վարչապետը չի էլ թաքցնում, որ երազում է խոսքի ազատության սահմանափակումների մասին, իհարկե, հիշատակելով կորոնավիրուսային համավարակը: Այս ո՞ր երկրներում են նման սահմանափակումներ մտցրել, որ մենք հետ ենք մնացել: 

Եւ չի կարելի անդադար ծանր մեղադրանք ներկայացնել ՀՀ քաղաքացիներին, պնդելով, թե կան ուժեր, որոնք մարդկանց մահն են ցանկանում: Չի կարելի այդքան իջնել: Չի կարելի այնպիսի բառապաշար օգտագործել, որից միայն ատելություն ու թշնամանք է բխում: Քննադատությունը չի կարելի ներկայացնել որպես գարշահոտություն: Իսկ դուք խոսում եք ժողովրդավարությունից: 

Ժողովրդի մի նեղ շերտի դուր գալու համար չի կարելի անդադար կրկնել, թե նախագահները, այն էլ այսպես կոչված, նախագահները թալանել են եւ թալանել: Չի կարելի այդքան իջնել: Ինչ վերաբերում է թափանցիկությանը, ապա մինչեւ մամուլի թափանցիկությանը հասնելը պետք է կառավարությունն օրինակ ծառայի: Եւ անգամ ամենավերջին միամիտն է հասկանում, որ թափանցիկությունը որպես պատրվակ օգտագործելով ընդամենը ցանկանում եք սահմանափակել կամ ընդհանրապես վերացնել ազատ խոսքը:

Մենք հիշում ենք, թե ինչ ակցիաներ կազմակերպվեցին մամուլի որոշ միջոցների դեմ: Մենք հիշում ենք, որ քրեական գործեր էլ կամ չհարուցվեցին կամ կարճվեցին: Այնպես չէ, որ դուք խորամանկ եք, իսկ մնացածն էլ միամիտ:

Եւ վերջապես չի կարելի ժողովրդին փորձել խաբել, թե ինչ-ինչ ուժեր ձեր դեմ հիբրիդային պատերազմ են մղում: Տապալել եք տնտեսությունը, տապալել եք համավարակի դեմ պայքարը, տապալել եք բոլոչ-բոլոր ոլորտները, ընդամենը ներողություն խնդրեք եւ հեռացեք եւ ոչ թե հիբրիդային պատերազմ հորինեք, չիշտ այնպես, ինչպես վարվում էին բոլշեւիկները անցած դարի քսան-երեսունական թվականներին:

Եթե գործող վարչապետը մինչ օրս չի ընկալում, թե կառավարությունն ինչու պետք է թափանցիկ լինի եւ կառավարությանը նույն հարթության վրա է դնում ծայրը ծայրին մի կերպ հասցնող լրատվամիջոցների հետ, ապա այդ երկիրը չի կարող լրջագույն խնդիրների չբախվել: 

Իսկապես, ժողովրդի աչքերի մեջ նայող եւ սուտ խոսող քաղաքական ուժը Հայաստանում քաղաքական գործունեություն չի ծավալելու, չի կարելի ժողովրդին ձեռք առնել: Իսկապես, չի կարելի սեփաքկանաշնորհել, մասնավորեցնել պետությունը, պետական կառույցները, կամայականորեն փոխել սահմանադրությունը, մեկնաբանել օրենքները: Չի կարելի: 

Չի կարելի բառախաղերի միջոցով մարդկանց թյուրիմացության մեջ գցել, չի կարելի խոստանալ տնտեսական հեղափոխություն հետո մոռանալ այդ մասին, չի կարելի խոստումներ տալ եւ մոռանալ այդ մասին, չի կարելի մարդկանց զրկել աշխատանքից եւ նրանց թողնել անօգնական: 

Իսկապես, նրանք, ովքեր բեմի հետեւից կառավարվել են սրա եւ նրա կողմից, շատ շուտով տեղ չեն ունենալու քաղաքական դաշտում: Շուտով հենց այդ ժամանակները գալու են: Այլ տարբերակ մեր երկիրը չունի: Այս մղձավանջը երկար չի կարող շարունակվել: Հաջորդ խորհրդարանն էլ բաղկացած է լինելու այնպիսի ուժերից, որոնք հեռու կլինեն պոպուլիզմից եւ դատարկախոսությունից:

Եւ հույս ունենալ, թե միայն ու միայն խորհրդարանում ներկայացված լինելու համար քաղաքական ուժերը կսկսեն աներկբայորեն պաշտպանել, այսպես կոչված, հեղափոխության գոյություն չունեցող արժեքները, առնվազն միամտություն է (Լուսավոր Հայաստանին չենք հաշվում): 

Ամենակարեւորը, երբ երկու տարի կառավարող ուժի ղեկավարն ինչ-ինչ ուժերի վախեցում է սոցիալական բունտով, սպառնում խլել նրանց ունեցվածքը, ուրեմն մենք մի մեծ, շատ մեծ խնդիր, որից օր առաջ պետք է ազատվենք: 

Փաշինյանը սպառնում է հանրահավաք անել: Սա արդեն ծիծաղելի է: Դուք այլեւս հանրահավաք չեք կարող անել: Դուք անգամ կսարսափեք ինքներդ հանրահավաք անել, քանի որ այն շրջվելու է ձեր դեմ: Դուք սա գիտակցում եք եւ կորոնավիրուսը դաշնակից դարձնելով փորձում եք երկարացնել ձեր իշխանությունը: Ընդամենը: Դուք անգամ չկարողացաք մարդ հավաքել մեկ տարի առաջ, երբ կոչ էիք անում փակել դատարանները: Սա է իրականությունը: Մի՞թե դիմակ բաժանելուց եւ սելֆիներ անելուց չհասկացաք, թե որտեղ է ընկել ձեր վարկանիշը:

Վարդան Մխիթարյան

Top-News.am