Լավ է, որ հերթական անգամ հայտնվել ենք գրոհի կիզակետում․ դա ապացուցում է, որ մենք ճիշտ ենք վարվել. Գևորգ Գորգիսյան

Անկեղծ ասած՝ ուրախ եմ, որ հերթական անգամ հայտնվել ենք գրոհի այսպիսի կիզակետում․ դա ապացուցում է, որ մենք ճիշտ ենք վարվել ու մեր քայլերը ձեռնտու չեն ո՛չ ներկաներին եւ ո՛չ էլ նախկիններին, այլ միտված են իրավական պետություն ունենալու մեր նպատակին։ Այս մասին հայտարարություն է տարածել «Լուսավոր Հայաստանի» պատգամավոր Գևորգ Գորգիսյանը։

Հայտարարության մեջ ասվում է.

«Լուսավոր Հայաստան» կուսակցությունն իր ստեղծման օրվանից խոսում է քաղաքական դաշտում արժեքներով ու սկզբունքներով առաջնորդվելու մասին՝ երկրորդ պլան մղելով անձերը։

Մենք միշտ եղել ենք ու կլինենք Հայաստանի Հանրապետությունում ժողովրդավարության, օրենքի եւ իրավունքի գերակայության առաջամարտիկները։

Վերջին օրերին, այո՛, քաղաքական մեծամասնությունը կոպտորեն խախտել է ՀՀ Սահմանդրությունը ու չի բացառվում, որ իշխանափոխությունից հետո, այս գործըթացներին կտրվեն իրավական գնահատականներ։ «Լուսավոր Հայաստանը», արձանագրելով այս փաստը, ձեռնարկելու է բոլոր միջոցները հակասահմանադրական գործընթացները սահմանադրական դատարանում վիճարկելու համար՝ զերծ պահելով իրավական գործընթացները քաղաքական ազդեցություններից։

Ցավոք, շատ են քաղաքական ուժերը, որ փորձում են խարխլել իրավական պետության հիմքերը՝ ի նպաստ իրենց քաղաքական, կլանային կամ անձնական շահերի։ Լուսավոր Հայաստանը հերթական անգամ հայտնվել է այդպիսի ուժերի հարձակման թիրախում։

Ես վստահ եմ, սա էլ կհաղթահարենք, որովհետեւ մեր դավանած գաղափարները երկարաժամկետ են ու միտված Հայաստանի հարատեւմանը, իսկ իրենց դավանած արժեքները՝ առօրեական ու անցողիկ։

Անկեղծ ասած՝ ուրախ եմ, որ հերթական անգամ հայտնվել ենք գրոհի այսպիսի կիզակետում․ դա ապացուցում է, որ մենք ճիշտ ենք վարվել ու մեր քայլերը ձեռնտու չեն ո՛չ ներկաներին եւ ո՛չ էլ նախկիններին, այլ միտված են իրավական պետություն ունենալու մեր նպատակին։

Կուսակցության ստեղծման օրվանից մենք ունենք մեր ուղին՝ հիմնված մեր նախանշած արժեքների վրա։ Դա կարող է ոմանց դուր գալ, ոմանց դուր չգալ, բայց քանի դեռ կան ՀՀ քաղաքացիներ, ովքեր սատարում են ժողովրդավար պետություն ու հզոր պետականություն կառուցելու մեր մոտեցումներին, մենք լինելու ենք քաղաքակնության մեջ ու թքած ենք ունենալու բոլոր տեսակի կազմակերպված գրոհների ու զրպարտությունների վրա։

Երբեք Հայաստանը չենք տարանջատել հնի ու նորի, մարդկանց չենք բաժանել հակադիր խմբերի, որովհետեւ դա չի բխել ու չի բխում Հայաստանի շահերից։ Միշտ հարգալից ենք եղել քաղաքական ընդդիմախոսների հետ՝ չանցնելով մարդկային փոխհարաբերությունների չգրված օրենքների սահմանները՝ փորձելով նոր որակ հաղորդել քաղաքական դաշտին։ Միշտ գործել ենք թափանցիկ՝ տրամաբանված հիմնավորումներով։

Վերահաստատում եմ, որ ճիշտ ժամանակին Լուսավոր Հայաստանը կլինի այն ուժը, որը կհամախմբի հայ մտքի հսկաներին՝ գեներացնելով այն լուսավոր էներգիան, որի շնորհիվ Հայաստանը կսկսի իր թռիչքաձեւ վերելքը։

Միգուցե հենց սրանից են վախենում շատերը, բայց դա արդեն իրենց խնդիրն է։ Վաղվա լուսավոր Հայաստանի կառուցման գործում մենք նահանջի տեղ չունենք։

Աստված պահապան Հայաստանի Հանրապետությանը, մեր քաղաքացիներին ու համայն հայությանը»,– ասվում է հայտարարությունում։