Այդ փոփոխությունն ինձ վերաբերվել չի կարող. Ալվինա Գյուլումյանը՝ սահմանադրական փոփոխության մասին

Այդ փոփոխությունն ինձ վերաբերվել չի կարող, որովհետեւ ես պաշտոնավարում եմ 2014-ի օգոստոսից, իսկ պարտկանությունների կատարմանն անցել եմ հոկտեմբերի 1-ից: Այս մասին, այսօր՝ հունիսի 23-ին ՍԴ-ի դիմաց լրագրողների հետ զրույցում նշեց ՍԴ անդամ Ալվինա Գյուլումյանը՝ անդրադառնալով ԱԺ-ում նախօրեին սահմանադրական փոփոխությունների որոշմանը, ըստ որի 12 տարուց ավելի պաշտոնավարած ՍԴ անդամների լիազորությունները դադարեցվում են:

Դիտարկմանը, որ ըստ երեւույթին հաշվարկվում է նաեւ նախկինում իր ՍԴ անդամ եղած ժամականահատվածը, Գյուլումյանը պատասխանեց. «Դա թողնում եմ ձեր տրամաբանությանը: Ես գտնում եմ, որ այո, պետք է պաշտոնավարեմ»:

Նա հավելեց, որ չի կարծում, որ բանը կհասնի դատական կարգով վիճարկելուն. «Դա իշխանության ընդունած օրենքն եւ այդ օրենքի համապատասխան այդ նորմն ինձ վրա չի տարածվում»:

Գյուլումյանը չցանկացավ գնահատական տալ ներկայացված որոշման վերաբերյալ. «Նախ վաղ է դրա համար, երկրորդն էլ չեմ բացառում, որ որեւէ մեկը կդիմի ՍԴ եւ ես չեմ ուզում ինձ կաշկանդել հետագայում այդ գործի քննությանը մասնակցելուց»:

Վենետիկի հանձնաժողովի ռեկոմենդացիաներում կան այնպիսի կետեր, որոնց իշխող քաղաքական ուժը չի հետեւել, բայց դրանք խորհրդատվական եզրակացություն են եւ ամեն կոնկրետ դեպքում պետք է գնահատվեն, ինչպես նաեւ հնարավոր գործի քննության դեպքում կարող է գնահատվել նաեւ ՍԴ-ի կողմից, դրա համար այս առումով նույնպես ձեռնպահ կմնամ գնահատական տալուց, նշեց ՍԴ անդամ Ալվինա Գյուլումյանը՝ անդրադառնալով ԱԺ-ի կողմից սահմանադրական փոփոխությունների որոշմանը:

Նա ընդգծեց, որ ՍԴ այն դատավորները, որոնց լիզորություններն այս փոփոխություններով դադարեցվում են, կարող են վարչական կարգով բողոքարկել, ապա սպառելով ներպետական ատյանները, կարող են դիմել Եվրոպական դատարան: Ես անձամբ դա կանեմ, որովհետեւ իմ պարագայում ավելի քան վստահ եմ, որ բոլոր հիմքերն ունեմ մինչեւ վերջ հասցնելու եւ հաղթանակելու:

«Հրանտ Նազարյանը եւ Ֆելքիս Թոխյանը նույնպես կարծում եմ, որ չեն լռի, բայց դա իրենց որոշելիք հարցն է: Դա իմ կարծիքն է»: