Նարեկ Մանթաշյանը հրավիրվել է ՔԿ՝ դատավոր Աննա Դանիբեկյանի քթի վիրահատության գործով

«Այլընտրանք» ՀԿ համահիմնադիր Նարեկ Մանթաշյանը հրավիրվել է հարցաքննության՝ դատավոր Աննա Դանիբեկյանի քթի վիրահատության գործով։ Այս մասին «Փաստինֆո»-ն տեղեկացավ «Այլընտրանք» ՀԿ համահիմնադիր Նարեկ Մանթաշյանից։

Նրա փոխանցմամբ՝ ՔԿ հարցաքննության է հրավիրվել վկայի կարգավիճակով, ծանուցումն ստացել է այսօր։

Հարցին, թե արդյո՞ք պատրաստվում է ներկայանալ վարույթն իրականացնող մարմին, Մանթաշյանը դրական արձագանքեց։

Նշենք, որ գործը քննում է ՔԿ հատկապես կարևոր գործերով քննության վարչությունը։

Ավելի վաղ հայտնել ենք, որ դատավորի՝ քթի վիրահատության մասին հրապարակումների առնչությամբ նախապատրաստված նյութերով ոստիկանությունում հարուցվել է քրեական գործ՝ ՀՀ քրեական օրենսգրքի 144-րդ հոդվածի և 145-րդ հոդվածի հատկանիշներով՝ մարդու անձնական կամ ընտանեկան գաղտնիք համարվող տեղեկություններն առանց նրա համաձայնության օգտագործելու , բժշկական գաղտնիք հանդիսացող տվյալներ հրապարակելու համար։ Նարեկ Մանթաշյանը տեղեկացրեց, որ նախկինում որևէ քննչական գործողության չի մասնակցել և այսօր առաջին անգամ է հրավիրվել հարցաքննության։

Հիշեցնենք, որ ՀՀ երկրորդ նախագահի և մյուսների գործով մարտի 17-ին նշանակված դատական նիստը չէր կայացել, թեեւ մինչ այդ դատավոր Աննա Դանիբեկյանի աշխատակազմից տեղեկացրել էին, որ այն կայանալու է ու պաշտպանական կողմը մարտի 16-ին ներկայացրել էր ՀՀ երկրորդ նախագահի խափանման միջոցը փոխելու մասին միջնորդությունը։ Դատական նիստի հետաձգումը պատճառաբանվել էր դատավորի վատառողջ լինելու հանգամանքով, սակայն հետագայում պարզվեց, որ նա ներկայացրել է անաշխատունակության թերթիկ ՝ դեռեւս մարտի 13-ի ամսաթվով ։ Ավելի ուշ՝ ապրիլի 9-ին մամուլում տեղեկություն հայտնվեց, որ Աննա Դանիբեկյանը պետպատվերի շրջանակներում վիրահատել է քիթը։

Հրապարակումներից 5 օր անց՝ ապրիլի 14-ին, ԲԴԽ-ն հայտարարություն տարածեց, թե դատավոր Աննա Դանիբեկյանի քթի վիրահատության վերաբերյալ մամուլի հրապարակումների առնչությամբ հրավիրել է գլխավոր դատախազության ուշադրությունը՝ օրենքով սահմանված կարգով դրանց քրեաիրավական գնահատական տալու համար: Մասնավորապես՝ ԲԴԽ-ն գտել է, թե հրապարակել են օրենքով պաշտպանված տեղեկություններ /բժշկական գաղտնիք պարունակող, անձնական կյանքին վերաբերող/։ Ապրիլի 16-ին դատախազությունից հայտնեցին, որ մամուլի հրապարակումներն ուղարկվել են ոստիկանություն՝ նյութեր նախապատրաստելու հանձնարարությամբ։ Նույն օրը հայտնի դարձավ, որ դատավորը վերադարձել է աշխատանքի և կրկին մեկնել հերթական արձակուրդը՝ դատական նիստի օր նշանակելով մայիսի 8-ին։