Պարզապես բաժակին ձեռք տալու արդյունքում հնարավոր չէ վարակվել. Ինչպես է Փաշինյանը դարձել վարակակիր՝ պարզաբանում է մասնագետը

Ի՞նչ հավանական տարբերակով կարող էր վարչապետ Փաշինյանը վիրուսակիր դառնալ։ Վարչապետի կեցավայրում մեկուսացած, Նիկոլ Փաշինյանը ժողովրդին պատմում է, թե ինչպես է դա տեղի ունեցել և հավանաբար դրա պատճառը, ըստ նրա, առանց պաշտպանիչ միջոցների՝ տվյալ դեպքում առանց ձեռնոցների ջրի բաժակներին կպած աշխատակիցն է եղել։

«Խոհրդակցության ժամանակ ջրի բաժակներ են դնում, մի օր ֆիքսեցի բաժակն առանց ձեռնոցի տեղադրելու փաստը, իհարկե նկատողություն արեցի ու առաջարկեցի, որ փոխեն, բայց ենթադրում եմ՝ դրանից առաջ էլ նույն կերպ է եղել։ Այն մարդը, ով մատուցում էր բաժակը, նրա մոտ էլ է կորոնավիրուս հաստատվել»,- ծառի տակ նստած ժողովրդի հետ կիսվում է վարչապետը։

Պարզելու համար, թե մասնագիտական մեկնաբանությամբ ինչպե՞ս է դա հնարավոր «Փաստինֆո»-ն կապ հաստատեց բժիշկ, Փաստահավաք խմբի անդամ Գևորգ Գրիգորյանի հետ։ Որքան է հավանականությունը, որ վիրուսակիր կոնտակտավորը բաժակի միջոցով փոխանցի վարակը, Գևորգ Գրիգորյանը պատասխանեց. «Նույն բաժակից օգտվելուց կոնտակտային ճանապարհով վարակի փոխանցումը թեորիապես հնարավոր է։ Այլ կերպ ասած՝ եթե կորոնավիրուսով վարակված անձի բերանը կպնի մի բաժակի, անմիջապես որից նույն կերպ՝ բերանով օգտվի մեկ այլ անձ, ապա վարակումն անխուսափելի է։

Մյուս բոլոր դեպքերում վարակվել կորոնավիրուսով՝ պարզապես բաժակին ձեռք տալու արդյունքում հնարավոր չէ։ Պարզապես բաժակին դիպչելով վարակակիր դառնալ հնարավոր էր միայն այն դեպքում, եթե ասենք պատկերացնենք, որ արդեն վարակակիր աշխատակիցը (ով ազգային անվտանգության նկատառումներից ելնելով իրավունք չուներ լինել աշխատակազմում, նա արդեն պետք է ստուգված և մեկուսացած լիներ) ով վիրուսակիր էր և առանց ձեռնոցի դիպչել է բաժակին, պետք էր հազար իր ձեռքի մեջ և առանց այդ ձեռքը սրբելու ձեռք տար այն բաժակին, որից օգտվել է Նիկոլ Փաշինյանը։ Այսպիսով պարզվում է, որ Կառավարության ներսում չեն պահպանվում տարրական հիգենիայի կանոնները, որի արդյունքում երկրի վարչապետն իր ողջ ընտանիքով կորոնավիրուսակիր է դառնում»։

Պարզաբանենք, որ վարչապետ Փաշինյանն իր կենդանի լայվում մանրամասնում է՝ «Մի օր ֆիքսեցի բաժակն առանց ձեռնոցի տեղադրելու փաստը», այսինքն՝ մի բաժակից երկու անձի օգտվելու փաստ այս նկարագրության մեջ կարծես չկա։ Բժիշկ Գրիգորյանը պարզաբանում է. «Սա ազգային անվտանգության խնդիր է, որովհետև մեր երկրի Կառավարությունը, այսինքն` Գործադիր մարմինն ու երկրի քաղաքական առաջին դեմքն ապահովագրված չէ, որ իր աշխատակազմը՝ կլինի խորհրդական կամ օգնական, իրեն չվարակեն կորոնավիրուսով։

Այդ մարդիկ էլ իրենց հերթին ապահովագրված չեն՝ գոնե տեստավորվելու, որպեսզի գոնե հասկանան՝ եթե իրենք ունեն կորոնավիրուս, ուրեմն պետք է չաշխատեն և չվարակեն երկրի թիվ մեկ քաղաքական ֆիգուրին և մնացյալին։ Ինչպես տեսնում ենք՝ Կառավարությունում նպատակահարմար չեն գտնում մասսայական տեստավորում իրականացնել։ Խնդիրն այստեղ է՝ մեր ազգային անվտանգությունը վտանգված է։ Նույն հաջողությամբ այդ նույն աշխատակիցը կարող էր վարակված լիներ ասենք՝ սիբիրյան խոցով և վարակեր վարչապետին ու նա իր ծննդյան օրով «լուսահոգի» դառնար, Աստված չանի իհարկե»։