ԱԱԾ-ն ոչ սովորական խորությամբ է ուսումնասիրել իր Դավիթ Սանասարյանի գույքը

Երեւանի ընդհանուր իրավասության դատարանի՝ Շենգավիթի նստավայրում դատավոր Դավիթ Բալայանի նախագահությամբ շարունակվում է ՊՎԾ (լիազորությունները ժամանակավորապես դադարեցված) պետ Դավիթ Սանասարյանի եւ մյուսների գործով դատական նիստին ուսումնասիրվել գործով առկա գրավոր ապացույցները։

Սանասարյանի պաշտպաններից Արսեն Սարդարյանը դատական նիստի ընթացքում հայտարարեց, որ ԱԱԾ-ն ոչ սովորական խորությամբ է ուսումնասիրել իր պաշտպանյալի գույքը.

«Ցանկանում եմ Ձեր ուշադրությունը հրավիրել, որ ԱԱԾ-ն պարոն Սանասարյանի գույքերով այնքան է հետաքրքրվել, որ նույնիսկ 2013 թվականի առք ու վաճառքի մասին տվյալներն է բերել դրել գործի մեջ»։

Դատավորի հարցին՝ արդյոք օրենքով արգելվո՞ւմ է, պաշտպանը պատասխանեց, որ դա ցույց է տալիս՝ ԱԱԾ-ն ոչ սովորական խորությամբ է ուսումնասիրել։

Դատավորը արձագանքեց. «Ես ունեցել եմ սովորականին չնմանվող գործեր։ ԱԱԾ-ն որ գործը քննում է, ինչքան ինֆորմացիա կա, հանում ու դնում է գործի մեջ։ Սա առաջին գործը չի»։

Մեղադրող դատախազն էլ նշեց, որ այստեղ մանիպուլյացիոն բնույթի հայտարարություն է հնչում, որը ոչ կառուցողական է. «Բոլոր ամբաստանյալների մասով էլ այդ տեղեկությունները հանված են։

Հիշեցնենք, որ Դավիթ Սանասարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 1-ին մասով` պաշտոնեական լիազորությունները չարաշահելու համար: Նրա նկատմամբ որպես խափանման միջոց է ընտրվել չհեռանալու մասին ստորագրությունը: Հիշեցնենք՝ քրեական գործով անցնում է 4 մեղադրյալ։ Սանասարյանից բացի, քրեական գործով ամբաստանվում են նաեւ ՊՎԾ եւս երկու աշխատակից՝ Գեւորգ Խաչատրյանը, Սամվել Ադյանը եւ վերջինիս ընկերը՝ «Զորաշեն» ՍՊԸ-ի փաստացի ղեկավար Տարոն Ավետիսյանը։