Վաղը, եթե սոցիալական լարվածությունն էլ ավելի մեծացավ, թող հետո մեղավորներ չփնտրեն. Նաիրա Զոհրաբյանը` ՀՀ կառավարությանը

 Սա շատ վատ ու վտանգավոր ցուցիչ է: Այս մասին այսօր Tert.am-ի հետ զույցում ասաց «Բարգավաճ Հայաստան» խմբակցության պատգամավոր Նաիրա Զոհրաբյանը` անդրադանառնալով կորոնավիրուսի տարածման այսօր արձանագրված ցուցանիշներին:

Հիշեցնենք, որ Հայաստանում մայիսի 18-ի դրությամբ հաստատվել է կորոնավիրուսով վարակման 351 նոր դեպք: Մահացել է 1 քաղաքացի: Վարակվածների ընդհանուր թիվը4823 է, մահացածների թիվը՝ 61:

«Սա այն պահը չէ, որ մեղավորներ փնտրենք, բայց ես կարծում եմ, որ այստեղ կառավարման խնդիր եղել է»,-ասաց Նաիրա Զոհրաբյանը և մասնավորապես նշեց, որ իրենք նախապես ասում էին Իտալիայից և Իրանից եկողներին ի սկզբանե մեկուսացնեն, ինչը չի արվել:

«Հիմա միմյանց հետ համագործակցելով համավարակի շղթան կոտրելու ժամանակն է; Եթե պարետատունը չկարողանա ապահովել քաղաքացիների անվտանգությունը և եթե ողջ պատասխանատվությունը գցի քաղաքացիների վրա, ապա մենք ուենանալու ենք վատ միտում: Այստեղ հանրությունը և կառավարությունը պետք է գործի որպես դաշնակիցներ, քաղաքացին պետք է իմանա իր պարտականությունները, իսկ պարետատունը չպետք է ողջ պատասխանատվությունը, նաև որոշ կառույցների անգործությունը գցի քաղաքացու վրա»,-ասաց նա:

Նաիրա Զոհրաբյանը նշեց, որ թեև կառավարությունը փորձում է ձեռնարկել քայլել, սակայն խնդիրը այն է, թե դրանք արդյունավետ են, թե ոչ, քանի որ այս համաճարակն այնպես ձնագնդիի էֆեկտով է տարածվում, որը դժվար է կառավարել:

Ըստ պատգամավորի՝ հաշվի առնելով սահմանափակումների վերացումը, տրանսպորտի աշխատելը՝ վարակակիրների թիվն ավելի շատ է լինելու, և կառավարությունը պետք է կոնկրետ քայլեր ձեռնարկի քաղաքացու անվտանգությունն ապահովող, որոնք չպետք է լինեն անտրամաբանական տուգանքների տեսքով:

«Այո՛, թվերը Հայաստանում մտահոգիչ են, մտահոգիչ են այն պատճառով, որ իշխանության տարբեր ներկայացուցիչներ ժամանակին ասում էին, որ կորոնավիրուսը ստից բան է, թույլ է քան նույնիսկ H1N1 գրիպը, ժամանակին կանխարգելիչ միջոցառումներ չձեռնարկվեցին, բայց հիմա այս մասին խոսելու ժամանակը չէ»,-ասաց նա:

Նաիրա Զոհրաբյանը կարևորեց սոցիալական օժանդականության շրջանակի մեծացումը և մասնավորապես նշեց, որ պետք է բոլոր ուսանողներին աջակցել` անկախ լավ ու վատ սովորելուց: «Այսօր սոցիալական լարվածությունը բավականին ուժգին է, մարդիկ չեն աշխատում, սպասարկման ոլորտը գրեթե կաթվածահար է, և կառավարությունը պետք է շատ ավելի թիրախային սոցիալական քաղաքականություն իրականացնի: Վաղը եթե սոցիալական լարվածությունը շատ ավելի մեծացավ, հետո թող մեղավորներ չփտրեն»,-ասաց նա: