VEON-ը դադարեցնում է քննարկումները UCom-ի հետ

Հեռահաղորդակցության և ինտերնետ ծառայություններ մատուցող VEON ընկերությունը, որը հայտնի է Beeline ապրանքանիշով, այսօր հայտարարել է UCom ընկերության հետ քննարկումները դադարեցնելու մասին, ասված է VEON-ի պաշտոնական կայքում հրապարակված կարճ հաղորդագրությունում:

Քննարկումները, ինչպես նշված է հաղորդագրությունում, ընթանում էին Հայաստանում գործող VEON-ի ընկերության՝ «ՎԵՈՆ Արմենիա»-ի ներգրավմամբ հնարավոր գործարքի շուրջ և բացահայտվել էին այս տարվա հունվարի 15-ին:

Այլ մանրամասներ առայժմ չեն հրապարակվում:

Տարեսկզբին, հիշեցնենք, կապի և հեռահաղորդակցության ծառայություններ մատուցող հայաստանյան UCom ընկերությունը Beeline-ը գնելու հարցով դիմել էր Հանրային ծառայությունները կարգավորող ու Տնտեսական մրցակցության պաշտպանության պետական հանձնաժողովներին:

Այդուհանդերձ, հնարավոր գործարքի առնչությամբ UCom-ի կառավարման խորհրդում խնդիրներ առաջացան, և մոտ մեկ ամիս առաջ ընկերության հիմնադիրներ ու մոտ 6 տոկոսի բաժնետերեր՝ եղբայրներ Հայկ և Ալեքսանդր Եսայանները հրաժարական տվեցին, նրանց հետևեցին բազմաթիվ աշխատակիցներ:

UCom-ի տնօրենների խորհրդի նախագահ Գուրգեն Խաչատրյանին էլ մոտ մեկ շաբաթ առաջ առանձնապես խոշոր չափով փողերի լվացման և կաշառք ստանալուն օժանդակելու մեղադրանք առաջադրվեց, նրա նկատմամբ խափանման միջոց ընտրվեց կալանքը, ինչից հետո Պետեկամուտների կոմիտեի նախկին նախագահ, ներկայումս անազատության մեջ գտնվող Գագիկ Խաչատրյանի որդին անհետացել է, նրա նկատմամբ հետախուզում է հայտարարվել: