Գավառից վիրավորումներով տեղափոխվածը վերակենդանացման բաժանմունքում է. նրա՝ մեկ տասնյակից ավելի հարազատները ԲԿ-ում են

NEWS.am-ի թղթակցի հաղորդմամբ՝ «Էրեբունի» բկ-ի վերակենդանացման բաժանմունքում է գտնվում Գավառ քաղաքից վիրավորումներով տեղափոխված քաղաքացիներից մեկը։

ԲԿ-ի մեր աղբյուրը հայտնում է, որ այս պահին ԲԿ-ի ինչպես գլխավոր մուտքի, այնպես էլ վերակենդանացման բաժանմունքի մուտքերի մոտ մեծ թվով ոստիկաններ խիստ հսկողություն են իրականացնում։ ԲԿ-ի տարածքում վիրավորի մոտ մեկ տասնյակից ավելի հարազատներն են։

Նշենք, որ Գավառի երեկվա միջադեպի հետեւանքով 5 քաղաքացի վիրավորումով տեղափոխվել է Երեւան քաղաքի տարբեր ԲԿ-ներ։ Նրանցից 2-ի վիճակը ծայրահեղ ծանր է, մեկի վիճակը՝ կայուն ծանր։

Հիշեցնենք, որ երեկ՝ ապրիլի 28-ին, Գավառ քաղաքում փոխհրաձգություն է տեղի ունեցել մի խումբ գավառցի երիտասարդների եւ նորատուսցիների միջեւ։ Կրակոցների հետեւանքով մահացու հրազենային վիրավորում է ստացել քննիչ Զորիկ Պարոնիկյանը եւ Նորատուս համայնքի բնակիչ՝ «Նորատուսցի արջ» մականունով երիտասարդը։ Վիրավորում են ստացել եւս 4 քաղաքացի, որոնցից 2-ը տեղափոխվել էին Երեւանի հիվանդանոցներից մեկը, իսկ 2-ը տեղափոխվել էին Գավառի հիվանդանոց։

Սակայն դեպքն այսքանով չի ավարտվել։ Տեղի է ունեցել դաժան վենդետա, և դա այն դեպքում, երբ ոստիկանապետ Արման Սարգսյանն անձամբ եղել է դեպքի վայրում, ոստիկանությունը փաստորեն չի կարողացել վերահսկել իրավիճակը։ Դանակներով զինված անձինք մտել են Գավառի հիվանդանոց, որտեղ այդ ժամանակ հսկողություն էին իրականացնում ոստիկանական ուժերը, հիվանդանոցում գտնվողներից երկուսի կոկորդը կտրել, մեկին՝ ծեծի ենթարկել։ Դրանից հետո նշված անձինք կարողացել են հեռանալ հիվանդանոցից։ Փաստորեն, ոստիկանները չեն կարողացել ոչ միայն կանխել հանցագործությունը, այլև ձերբակալել հանցագործությունը կատարողներին։ Ոստիկանությունը մյուս կողմից հայտարարում է, որ ոստիկանապետը եղել է հնչած կրակոցների դեպքի վայրում՝ Ազատության պողոտայում։ Մեր տեղեկություններով՝ 2 քաղաքացիները, որոնց կոկորդը կտրել են, հարազատ եղբայրներ են. նրանցից մեկի անունը Արմեն է, մյուսինը՝ Խաչիկ։ Վիրավորներից մի քանիսին տեղափոխել են Երևան, նրանցից մեկի վիճակը մեր տեղեկություններով միջին ծանրության է, մյուս երկուսինը՝ ծայրահեղ ծանր։

Հարուցված քրեական գործի շրջանակում կատարվում է նախաքննություն:

Ինչպես կրակոցներով, այնպես էլ դրան հաջորդած դեպքերով կան բերման ենթարկվածներ։