Հայաստանի եւ Ռուսաստանի հարաբերություններում ամեն ինչ հարթ չէ. քաղաքագետ

Թուրքիայի ԱԳՆ ղեկավարի հետ ԵԱՀԿ ՄԽ համանախագահների հանդիպումը ողբերգություն չէ, նման հանդիպումներ նախկինում եւս եղել են, խնդիրն այլ է: Այս մասին ռուս-թուրքական հարաբերություններին նվիրված քննարկման ընթացքում ասաց քաղաքագետ Անդրանիկ Թեւանյանը:

«Խնդիրը տարաձայնություններն են, կասկածները՝ կապված հայ-ռուսական հարաբերությունների հետ»,- նշեց քաղաքագետը: Նրա խոսքով՝ Արցախի հարցով Հայաստանի իշխանությունները հստակ հայտարարություններ չեն անում: «Խոսում են ամեն ինչի մասին, սակայն կոնկրետ ոչինչ չեն: Սակայն պետք է հստակ հայտարարել ինքնորոշման իրավունքի իրականացման ապահովման մասին, այն մասին, որ Արցախը ոչ մի հանգամանքում չի լինի Ադրբեջանի կազմում»,- հիշեցրեց քաղաքագետը՝ հավելելով, որ չնայած բանակցություններին Արցախի մասնակցության անհրաժեշտության մասին հայտարարություններին՝ տպավորություն է ստեղծվում, որ այդպիսով պատասխանատվությունը Հայաստանից փոխանցվում է Արցախին: «Այդ մոտեցումը չի համապատասխանում հայ ժողովրդի շահերին: Այնպիսի տպավորություն է, որ իշխանությունները ոչ միայն չեն կարողանում, այլ նաեւ չեն ցանկանում խորանալ այդ խնդրի մեջ եւ լուծել այն»,- նշեց Թեւանյանը:

Իր հերթին, քաղաքագետ Երվանդ Բոզոյանը պատմական զուգահեռներ ներկայացրեց՝ հիշեցնելով, որ Հայաստանի ղեկավարության չմտածված քաղաքականությունը տարածքային մեծ կորուստների է հանգեցրել անցած դարում: Այսօր եւս նման արդյունք կարող է լինել: