Պարտադիր կուտակային համակարգը անարդյունավետ եւ անարդար է, որը պետք է օր առաջ վերացնել. Պարսյանը միֆեր նշեց

ՀՅԴ-ի դիրքորոշումը պարտադիր կուտակային կենսաթոշակային համակարգի նկատմամբ նույն է եղել թե իշխանության եղած ժամանակ, թե հիմա: Այս մասին ՀՅԴ Գերագույն մարմնի կազմակերպած «ՀՀ սոցիալ-տնտեսական ոլորտի խնդիրները, դրանց լուծման ուղիները» թեմայով քննարկման ժամանակ իր խոսքում նշեց ՀՅԴ Բյուրոյի տնտեսական հետազոտությունների գրասենյակի պատասխանատու, տնտեսագետ Սուրեն Պարսյանը:

Նա նշեց, որ պարտադիր կուտակային կենսաթոշակային համակարգի հետ կապված մի քանի միֆեր կան. «Առաջինն այն է, որ այդ միջոցները երաշխավորված են եւ այդ գումարները մենք ստանալու ենք: 2019-ի դեկտեմբերի 1-ի դրությամբ այդ ֆոնդերի ձեռքում է գտնվում 244 մլրդ դրամ գումար եւ պետությունը չի կարող երաշխիք տալ այդ միջոցների համար: Անգամ դրա կեսի համար չի կարող տալ երաշխիք՝ հաշվի առնելով, որ այդ գումարներն աճելու են տարիներ շարունակ: Սա լուրջ ֆինանսական ռիսկեր է պարունակում:

Մյուս միֆն այն է, որ մենք անցել ենք անվերադարձելիության կետը. Նման բան գոյություն չունի: հունգարիան 1997 թվականին ընդունեց այդ համակարգը, իսկ 2010-ին հրաժարվեց՝ 13 տարի հետո: Դանիոն ընդունեց 1998-ին, հրաժարվեց 2010-ին՝ 12 տարի հետո: Սլովակիան 2004-ին ընդունեց, 2009-ին հրաժարվեց: Այսինքն սա համակարգ է, որի անարդյունավետությունն արդեն կա եւ լավագույն օրինակներից մեկը Չիլին է: 2008 թվականին եկել էր ժամանակը, որ պետք է արդեն կենսաթոշակ կա, եւ պարզվեց, որ կենսաթոշակառուների 88 տոկոսը ստանալու են նվազագույն աշխատավարձից ցածր կենսաթոշակ, մինչդեռ նախատեսվում էր միջին աշխատավարձի 40 տոկոսի չափով»:

Պարյանը նկատեց, որ այս համակարգի դեպքում հատկապես ցածր թոշակ են ստանալու 3 եւ ավելի երեխաներ ունեցող կանայք, քանի որ այդ տարիներին նրանք չեն աշխատել եւ ոչինչ չեն կուտակել: «Սա անարդյունավետ եւ անարդար համակարգ է, որը պետք է օր առաջ վերացնել»,-ընդգծեց տնտեսագետը: