Երեւանի քաղաքապետարանի 20 աշխատակից փետրվարին պարգեւատրվել է ընդհանուր 6.59 մլն դրամով

Երեւանի քաղաքապետ Հայկ Մարությանի՝ մարտի 2-ին ստորագրած կարգադրությամբ՝ Երեւանի քաղաքապետարանի 20 աշխատակից փետրվարին աշխատանքի համար պարգեւատրվել է, ընդհանուր առմամբ, 6.590.000 ՀՀ դրամով։ Այս մասին NEWS.am-ը տեղեկանում է Երեւանի քաղաքապետարանի կայքից:

Որոշման համաձայն՝ պարգեւատրումները կատարվել են աշխատանքային եւ ծառայողական պարտականությունները բարեխիղճ եւ պատշաճ կատարելու համար:

Պարգեւատրված 20 աշխատակիցներից են քաղաքապետի առաջին տեղակալ Հրաչյա Սարգսյանը, տեղակալներ Հայկ Սարգսյանը, Սերգեյ Հարությունյանը, Տիգրան Վիրաբյանը, Երեւանի գլխավոր ճարտարապետ Արթուր Մեսչյանը եւ աշխատակազմի քարտուղար Վահե Խաչատրյանը՝ յուրաքանչյուրը 480.000 դրամի չափով, իսկ քաղաքապետարանի վարչության պետերը՝ յուրաքանչյուրը 265.000 դրամի չափով։

Հիշեցնենք, որ Երեւանի քաղաքապետարանի աշխատակիցներին եւ վարչական շրջանի ղեկավարները պարգեւատրվել էին նաեւ տարեսկզբին: Նրանց հատկացվել էր ընդհանուր 24.8 միլիոն դրամ պարգեւավճար որպես խրախուսանք բարեխիղճ աշխատանքի համար եւ եւս 600.000 դրամ պարգեւավճար Ամանորի միջոցառումները պատշաճ կազմակերպելու համար։