«Մեր հարաբերությունները ամրացնող եւս մեկ գործոն է հայտնվել». Փաշինյանը՝ Վրաստանի վարչապետին

Հայաստանն ու Վրաստանն ունեն խորը մշակութային, քաղաքական, տնտեսական, պատմական կապեր: Այս մասին, այսօր՝ մարտի 3-ին, Վրաստանի վարչապետ Գիորգի Գախարիայի հետ հանդիպման ժամանակ նշել է ՀՀ վարչապետ Նիկոլ Փաշինյանը:

«Մեր երկրների միջեւ հարաբերությունների կարեւորությունը դժվար է գերագնահատել: մեր երկրները ունեն խորը մշակութային, քաղաքական, տնտեսական, պատմական կապեր:

Մենք հազարամյակներով ապրել ենք կողք կողքի եւ կարծում եմ, որ ժամանակն է եկել մտածել եթե ոչ ապագա հազարամյակներին, ապա գոնե հարյուրամյակներին այս տարածաշրջանը համատեղ զարգացնելու մասին: Վրաստանի հետ հարաբերությունների մեր պատկերացումները ռազմավարական են:

Մեր երկու երկրներն ունեն ավելի լայն համագործակցության եւ՛ ընդհանուր, եւ՛ տարբերվող դաշտեր, բայց մեզ համար տարածաշրջանային հարաբերությունները, մեր հարեւան, բարեկամների, Վրաստանի հետ մեր հարաբերությունները բոլորովին այլ հարթության վրա ենք մենք դիտարկում:

Մեր հարաբերությունները ամրացնող եւս մեկ գործոն է հայտնվել. դա մեր ժողովուրդների հստակ նվիրվածությունն է ժողովրդավարությանը եւ ժողովրդավարական զարգացման տեսլականին: Այս հանգամանքը, իմ համոզմամբ, մինչեւ այժմ գոյություն ունեցած շատ ամուր հիմքի վրա ավելացնում է եւս մեկ կարեւոր անկյունաքար»,- նշեց ՀՀ վարչապետը:

Նիկոլ Փաշինյանն արձանագրեց, որ վերջին 1.5 տարվա ընթացքում իսկապես հաջողվել է Վրաստանի հետ համագործակցության նոր որակ, նոր մակարդակ ստանալ. «Ուզում եմ այս արդյունքն առանձնահատուկ շեշտելով ասել նաեւ, որ համոզված եմ, որ այս այցն ու դրա արդյունքներն ավելի կուժեղացնեն այդ հանգամանքը: Մեզ հաջողվում է շատ հստակ քայլերով մեր բոլոր պայմանավորվածությունները կյանքի կոչել»,- ընդգծեց Փաշինյանը:

Փաշինյանը նկատեց, որ իրենց հաջողվում է շատ հստակ քայլերով բոլոր պայմանավորվածությունները կյանքի կոչել. «Ես ջերմությամբ եմ հիշում մեր առաջին հանդիպումը Երեւանում, եւ իհարկե, մեծ հաճույքով եմ հյուրընկալվում ձեզ, որովհետեւ հյուրերին ընդունելի աբրձր մշակույթը այն ամենակարեւոր առանձնահատկություններից է, որ միացնում է մեր երկու ժողովուրդներին ու երկրներին»:

Վրաստանի վարչապետ Գիորգի Գախարիան էլ հավելեց, որ Հայաստանն ու Վրաստանը կառավարությունների մակարդակով ամենօրյա ռեժիմով աշխատում են, որպեսզի էլ ավելի խորացնեն հայ-վրացական բարեկամական հարաբերությունները: «Մենք միշտ էլ իրար հետ զրույցներում համաձայնել ենք, որ բարձր մակարդակի հանդիպումները հիմք են նախարարությունների եւ գերատեսչությունների աշխատանքի համար: Ես հիշում եմ մեր հանդիպումը Երեւանում, այն անցավ շատ արդյունավետ եւ կարծում եմ, որ այսօրվա հանդիպումը եւս հիմք կդառնա մեր երկու ժողովուրդների հարաբերությունների էլ ավելի խորացման համար: Մենք բարդ տարածաշրջանում ենք ապրում եւ հասկանում ենք, որ տարածաշրջանում կայունությունը մեր երկրների զարգացման անխուսափելի հիմքն է: Նախ, մենք պետք է հոգ տանենք մեր երկրների խաղաղության մասին, հետո նոր տնտեսական, քաղաքական, մշակութային եւ բոլոր այն հարցերի մասին, որոնք շոշափվում են»,- նշեց նա:

Գիորգի Գախարիան համոզվածություն հայտնեց, որ Հայաստանի ու Վրաստանի խաղաղությունը, զարգացումը, հեռանկարը կապված է եվրատլանտյան տարածք ինտեգրվելու հետ եւ համոզված է, որ Արեւելյան գործընկերության շրջանակներում Հայաստանը եւս ձգտում է ինտեգրվել Եվրոպային:

«Համոզված եմ, որ մենք ձգտում ենք Հայաստանի եւ Վրաստանի բարեկամության էլ ավելի խորացմանը»,-ընդգծել է Գախարիան: