Հայաստանի Հանրապետությունում քաղաքական հետապնդում որևէ մեկի նկատմամբ չի իրականացվում. Արման Սարգսյան

Հայաստանի Հանրապետությունում քաղաքական հետապնդում որևէ մեկի նկատմամբ չի իրականացվում: Այս մասին լրագրողների հետ զրույցում ասաց ՀՀ ոստիկանության պետի ժամանակավոր պաշտոնակատար Արամ Սարգսյանը` անդրադառնալով «ՎԵՏՕ» հասարակական-քաղաքական շարժման և «Ադեկվադ» միաբանության անդամների ձերբակալություններին:

«Մարդիկ ազատ խոսքի հնարավորության շրջանակում սրանք անվանում են քաղաքական հետապնդում, բայց հետապնդման մասին խոսք լինել չի կարող, թե ձեր նշած անձանց, թե մյուսների առումով: Ոստիկանությունն այն կառույցն է, որ անընդհատ չպետք է գովեն և քննադատությունն էլ շատ նորմալ ենք համարում, բայց ցանկալ է լսել առողջ քննադատություն»,-ասաց նա:

Անդրադառնալով ոստիկանության անհամաչափ ուժի կիրառման վերաբերյալ քննադատությանը՝ Արման Սարգսյանն ասաց, որ ոստիկանությունն իր լիազորության շրջանակում իրականացրել է գործառույթներ և դրանք եղել են օրենքի սահմաններում: «Ոստիկանությունը լինելով հետաքննություն իրականացնելու իրավասու մարմին՝ ստացված տեղեկությունը ստուգելու նպատակով բերման է ենթարկել անձի և ստուգման արդյունքներով ազատ արձակել»,-ասաց նա և նշեց, որ հնարավոր է պարբերաբար նույն անձանց, նկատի չունեմ այդ չորսին, բերման ենթարկել:

Արման Սարգսյանը նշեց, երբ կարիք է առաջանում իրականացնել ծառայողական քննություն՝ ստուգելու ոստիկանության ծառայողների գործողությունների իրավաչափությունը, այդ տրամաբանության մեջ նշանակվում է քննությունը: Այս դեպքով է եթե առաջանա, ապա կնշանակենք:

Ինչ վերաբերում է ոստիկանապետի պաշտոնը ստանձնելուն՝ ասաց. «Մեր պաշտոնի ու պաշտոնավարման վերաբերյալ քննարկման կարիք չկա, քանի որ վարչապետը պարբերաբար հնչեցրել է, որ ժամանակավոր պաշտոնակատարի համար գոյություն ունի սահմանված ժամկետ: Ես իմ պարտականությունները կատարելու եմ մինչև վերջին պահը` բարեխղճորեն և բարձր պատասխանատվությամբ»:

Հարցին, թե եղել է առաջարկ 6 ամիս հետո զբաղեցնել ՀՀ ոստիկանապետի պաշտոնը, նա ասաց. «Եթե դեռ չի որոշվել, ես եմ մնալու, թե ոչ, ինչի պետք է առաջարկ լինի: Ես ցանկություն ունեմ ծառայելու Հայաստանի Հանրապետությանը, եթե ոչ այս պաշտոնում, ապա ես, ամենայն հարգանքով օրենքի նկատմամբ, կշարունակեմ ծառայել Հայաստանի Հանրապետությանը»:

Արման Սարգսյանն ասաց, որ դատաիրավական բարեփոխումների շրջանակում, որի համակարգող մարմինը ՀՀ արդարադատության նախարարությունն է, մշակվում է ՀՀ ոստիկանության զարգացման հայեցակարգը և ռազմավարությունը: Նա նշեց, որ ԱԺ «Իմ քայլը» խմբակցության հետ հանդիպումը համարում է կայացած, քանի որ քննարկվել են տարաբնույթ, այդ թվում՝ սուր հարցեր:

Հիշեցնենք, որ երկու օր առաջ ՀՀ ոստիկանության 6-րդ վարչություն էին բերման ենթարկվել «ՎԵՏՕ» հասարակական-քաղաքական շարժման հիմնադիր, հասարակական գործիչ Նարեկ Մալյանը, «Ադեկվադ» միաբանության ղեկավար Արթուր Դանիելյանն ու միաբանության հիմնադիր-անդամ Կոնստանտին Տեր–Նակալյանը, ինչպես նաև այլ անդամներ, իսկ նույն օրը երեկոյան «Քաղաքացիական գիտակցություն» ՀԿ հիմնադիր Նարեկ Սամսոնյանը։